Расейская «Транснафта» патрабуе ад Беларусі 313 тысячаў даляраў камэнсацыі. Пачатак перамоў, аднаўленьне транспартаваньня нафты й адмена Беларусьсю мыта не паўплывалі на пазыцыю кампаніі: «Мы будзем патрабаваць вяртаньня гэтых грошай», — заявіў яе кіраўнік Сямён Вайншток.
Расейская нафтавая кампанія «Транснафта» выставіла прэтэнзіі беларускаму дзяржаўнаму нафтатранспартнаму прадпрыемству «Гомельтранснафта» Дружба» пра спагнаньне шкоды ў памеры 313 тысячаў даляраў, — паведамілі «Інтэрфаксу» ў канцэрне «Белнафтахім».
«У прэтэнзіі адзначана, што «Транснафта» панесла страты ў сувязі з вымушаным захоўваньнем нафты ў нафтасховішчах, нерасходаваньнем ужо аплачанай энэргіі й невыкананьнем абавязальніцтваў перад пастаўнікамі», — патлумачыў суразмоўца агенцтва.
Згодна з працэдурай, пасьля адказу на прэтэнзію, у выпадку, калі адказ ня будзе задавальняць расейскую кампанію, яна можа падаць у суд па месцы знаходжаньня адказьніка.
Пра падачу пазоваў па факце адбіраньня Беларусьсю нафты з трубаправодаў паведаміў у аўторак 9 студзеня кіраўнік Мінпрамэнэрга Расеі Віктар Хрысьценка. Паводле ягоных словаў, нафта адбіралася ў той момант, калі Беларусь ужо спыніла прапампоўваньне, а «Транснафта толькі прымала адпаведныя рашэньні з свайго боку. 7 студзеня ў кірунку «Адамавай заставы» было адабрана каля 80 тысячаў тон, сказаў міністар.
На пытаньне, ці плянуе «Транснафта» адмовіцца ад судовых прэтэнзій да беларускага боку ў сувязі з пачаткам перамоваў, аднаўленьнем транспартаваньня нафты й адменай Беларусьсю мыта, кіраўнік кампаніі «Транснафта» Сямён Вайншток 10 студзеня заявіў: «Зараз я магу сказаць адно. Мы ацанілі нашыя страты ў 9 млн. рублёў і прад’явілі яго гомельскаму прадпрыемству. Мы будзем патрабаваць вяртаньня гэтых грошай. Пра далейшы лёс судовых прэтэнзій я пакуль сказаць нічога не магу».
На ілюстрацыі — фрагмэнт галоўнай старонкі сайту Transneft.ru з выявай Сямёна Вайнштока
Цяпер чытаюць
«Цяпер мне чужая сама канцэпцыя ўжыць нешта, чаго ты не ведаеш». Вялікая гутарка з Іванам Шылам пра бізнэс, зараблянне з дапамогай ШІ, жанчын і ботакс15
Каментары