Затрыманыя лідэры «Маладога фронту» — 27 чалавек
Увесь нядзельны вечар працягваліся ператрусы, арышты і допыты актывістаў незарэгістраванага Маладога Фронту. Невядомае знаходжаньне Зьмітра Хведарука. Паводле некаторых зьвестак, яго перавезьлі ў «амэрыканку» і яму пагражае крымінальная справа.
У нядзелю, 4 лютага, у Менску на прыватнай кватэры меўся прайсьці сход Цэнтральнай Рады незарэгістраванай арганізацыі «Малады фронт». На Раду зьехаліся кіраўнікі забароненай арганізацыі з усіх рэгіёнаў краіны, а таксама тыя, хто цяпер навучаецца ў Польшчы (усяго 27 чалавек).
Недзе паміж 16.30 і 17.00 прыватную кватэру, што знаходзіцца ў жылым доме за Камароўкай, заблякавалі супрацоўнікі МУС, КДБ і байцы спэцназу. Усіх прысутных пры панятых прымусілі
на відэакамэру назваць сваё імя і прозьвішча. Яны пазабіралі мабільнікі ў маладых людзей. Нехта з маладых людзей схаваў тэлефон і паслаў некалькі смс-ак журналістам і сваякам, расказваючы што зь імі робяць. Пасьля таго, як усіх вывезьлі ў РУУС, у кватэры прайшоў ператрус.
***
19.40.
Тры гадзіны пасьля затрыманьня маладых людзей — сярод іх непаўналетнія — нейкі час вадзілі паміж «апарняком», што разьмешчаны каля Савецкага РУУС і «аўтазакам» — туды і сюды. Адзін з канваяваных крыкнуў журналістам і бацькам, што дзяжураць ля РУУС, што ім пагражае «крымінальная справа».
Сярод затрыманых — студэнты праграмы Каліноўскага Яўген Скрабутан і Барыс Гарэцкі. У Яўгена мусіць быць заўтра ў Польшчы іспыт.
А 19.45 пад'ехаў вялікі МАЗ-аўтазак. Па адным маладафронтаўцаў заводзяць у МАЗ. Ёсьць меркаваньне, што маладых людзей павязуць на Акрэсьціна.
20.40
Паводле відавочцаў, аднаго з затрыманых завялі ў аўтамабіль «ГАЗель», накінуўшы на галаву куртку. Імаверна, гэта быў Зьміцер Хведарук, які здолеў смскай паведаміць сябрам, што яму пагражае крымінальная справа і яго вязуць у «амэрыканку».
У актывісткі «МФ» Насты Палажанкі ў хаце ідзе ператрус.
Маладафронтаўца Алега Корбана, у якога сёньня дзень народзінаў, забралі з хаты міліцыянты.
Адпушчаны дзясятак непаўналетніх маладафронтаўцаў. Іншая частка затрыманых, у тым ліку «каліновец» Яўген Скрабутан, працягваюць сядзець у аўтазаку.
23.20
Усіх затрыманых, апроч Зьміцера Хведарука, адпусьцілі. Пра знаходжаньне апошняга дакладнай інфармацыі пакуль няма. Вядома толькі, што Хведарука дапытвалі каля дзьвюх гадзінаў.
У гэты момант на кватэрах Янушэўскага Аляксея, непаўналетняй Насты Палажанкі, а таксама Яраслава Грышчэні з Баранавічаў ідуць ператрусы.
Паводле словаў Яўгена Скрабутана, усім затрыманым прапаноўвалі напісаць заявы аб добраахвотным выхадзе з «Маладога Фронту».
На пратэстанцкі фестываль у «Чыжоўку-Арэну» едзе амерыканскі прапаведнік Франклін Грэм. Разам з ім чакаюць Коўла з жонкай14
Каментары