ААТ «Бабулін збан» цягам найбліжэйшага паўгоддзя будзе пераўтворанае ў холдынг, заявіў генеральны дырэктар прадпрыемства Ігар Кананчук.
«Кіраўніцтвам вобласці прынятае рашэнне, што на базе прадпрыемства павінен быць створаны малочны холдынг. Дарэчы, гэта пакуль першы ў рэспубліцы холдынг», — сказаў кіраўнік прадпрыемства.
Паводле яго словаў, у малочны холдынг увойдуць практычна ўсе малочныя прадпрыемствы Магілёўскай вобласці. Такім чынам, холдынг будзе складацца з 19 структурных падраздзяленняў, куды ўвойдуць усе падраздзяленні ААТ «Быхаўмалако», 2 заводы ў Мсціслаўскім і 4 — у Асіповіцкім раёнах.
Цяпер вытворчыя магутнасці прадпрыемства дазваляюць перапрацоўваць 1700 тон малака ў суткі. Выпускаецца малочная прадукцыя больш за 300 найменняў.
У 2001 годзе ў склад прадпрыемства, якое тады называлася ААТ «Магілёўскі малочны камбінат», увайшлі ААТ «Круглянскі масларобны завод» і ААТ «Краснапольскі завод заменнікаў неразведзенага малака». У красавіку 2005 былі далучаныя ААТ «Кіраўскі масларобны завод», ААТ «Бялыніцкі сыраробны завод» і ААТ «Дрыбінскі масларобны завод», а ў снежні 2005 года — ААТ «Крычаўскі масларобны завод». У канцы 2006 года ў склад прадпрыемства увайшоў «Касцюковіцкі малочны завод».
Цяпер чытаюць
Ананімы — гісторыі беларусаў, якім прыходзіцца шыфравацца, бо рэжым лічыць іх дзейнасць «крыміналам»2
Каментары