Памятаеце жанчыну, якую падманулі расійскія турысты? Кампанія, якая тут ні пры чым, прапанавала ёй кампенсацыю
Гісторыя пра непрыемны досвед здачы кватэры ў арэнду маладой сям’і з Расіі выклікала шквал каментарыяў. Многія расіяне папрасілі прабачэння за сваіх землякоў, а адна кампанія вырашыла пайсці далей і прапанавала пацярпелай гаспадыні кампенсацыю.
Некалькі дзён таму беларуска Дар’я расказала пра сумны досвед арэнды кватэры ў Магілёве. Маладая сям’я з Расіі адмяніла браніраванне напярэдадні заезду, але насамрэч скарысталася жыллём: гаспадыня паспела выслаць ім інструкцыю, як трапіць у памяшканне, і госці цішком пражылі там суткі.
Пад адпаведным ролікам у TikTok найбольш папулярным стаў каментарый, які паказвае, што беларусы не маюць ілюзій наконт маральных якасцей расіян: «Нехта здзіўлены?»
І такі водгук далёка не адзіны.
«Вы яшчэ здзіўляецеся?», «Я нават не здзіўлены», «Я ні капелькі не здзіўлены», «Чэсна, не здзіўлены», «Увогуле не здзівіла», — пішуць беларусы.
«А потым дзівяцца: «А чаго нам не радыя?», «Ад расіян ні кроплі не здзіўленая: чым больш сутыкаюся па працы з расіянамі, тым больш люблю нашых беларусаў», «А потым пытанні, чаму беларусы незычлівыя да рускіх», — дадаюць іншыя карыстальнікі.
«Знаёмцеся: «братэрскі народ, які трэба любіць, прымаць і паважаць»», «Яны браты і сёстры, любіце іх», — з іроніяй заўважаюць гледачы.
«З такімі сваякамі лепш быць сіратой», — адказваюць ім у каментарыях.
«Не трэба па адной сям’і судзіць пра ўсю краіну. Дрэнныя людзі ёсць у кожнай дзяржаве», — парыруе іншы глядач.
Другой па папулярнасці стала заўвага: «Навошта адпраўляць інструкцыю, пакуль няма аплаты?»
Асобныя карыстальнікі звяртаюць увагу на тое, што такое пранікненне ў кватэру можа цягнуць на крымінальны артыкул.
Разам з тым знайшліся і тыя, хто палічыў патрэбным папрасіць прабачэння за паводзіны сваіх землякоў.
«Многія рускія не паважаюць беларусаў. Я быў у Мінску і разумею, што Беларусь цудоўная, а беларусы — культурныя людзі. Павагі да іх больш, чым да землякоў», — заўважае яшчэ адзін карыстальнік.
Нечаканы паварот у гісторыі адбыўся, калі кампанія, якая гандлюе ў інтэрнэце падсанкцыйнай тэхнікай, публічна прапанавала кампенсаваць нанесеную беларусцы шкоду:
«Наша кампанія не мае ніякага дачынення да гэтай сітуацыі. Але мы вельмі спачуваем беларусцы, якая сутыкнулася з такой непавагай. Мы гатовыя кампенсаваць ёй страты. Для гэтага ёй дастаткова проста звязацца з намі. Дапаможам аднавіць справядлівасць».
Цяпер чытаюць
Масавыя арышты афіцэраў прайшлі на авіябазе ў Мачулішчах — абвінавачваюць у сувязях з апазіцыяй30
Каментары
Татара-манголы!