На БТ агучылі інфармацыю, што работніца Мазырскага НПЗ Марына Цыбліенка падала ў суд на Віктара Івашкевіча.
Падставай для пазову стала тое, што Віктар Івашкевіч заклікаў эўрапейскія кампаніі байкатаваць беларускія нафтапрадукты. Паводле зыску Цыбліенка патрабуе ад Віктара Івашкевіча 500 тысяч беларускіх рублёў для кампэнсацыі маральных стратаў, якія нібыта нанесьлі ёй асабіста выказваньні Івашкевіча. Таксама яна патрабуе, каб ён адмовіўся ад далейшых заклікаў да санкцый.
«Панарама" паведамляе, што суд прыняў пазоў Цыбліенкі і ў якасьці судовай меры абмежаваў Віктару Івашкевічу выезд за мяжу.
Апроч гэтага ў «Панараме» быў паказаны сюжэт пра паседжаньне прафсаюзнай арганізацыі ААТ «Нафтан». Журналісты БТ сьцьвярджаюць, што на ім быў прыняты дакумант, які таксама асуджае тых, хто заклікае прымяніць эканамічныя санкцыі ў дачыненьні да Беларусі. У дакумэнце гаворыцца, што «работнікі «Нафтану» пакідаюць за сабой права падаць у суд на грамадзянаў Івашкевіча, Калякіна, Вуса і іншых».
Віктар Івашкевіч кажа: «Мне ніякіх позваў не дасылалі, не перадавалі, ніякіх расьпісак пра тое, што мне абмежаваны выезд, я не даваў. Ня ведаю, што за суд. Затое ведаю, што яшчэ з савецкіх часоў на кожным прадпрыемстве ёсьць такая група рабочых, якія звычайна садзяць у прэзыдыюме. Яны шчыра стараюцца быць каля начальства. Яны вось раней уступалі ў камуністычную партыю, сядзелі ў прэзыдыюмах, уваходзілі ў камітэты. Гэта ўсё працяг савецкіх часоў. А ўжо пры Сталіне як крычалі «сабак да адказу». Гэта ж таксама рабілі рабочыя-актывісты. Абсалютна гэта ня значыць, што такія настроі ў масы людзей. Паводле апошняга дасьледаваньня НІСЭПД, 66% беларусаў лічаць, што трэба выпускаць палітвязьняў. Гэта для таго, каб унармаляваць адносіны і зьняць санкцыі. Трэба выпускаць палітвязьняў, і ня будзе размовы пра санкцыі. А гэта бязглузды адказ на санкцыі з боку Эўразьзвязу. Гэта нейкі сьмешны іхны ход. Мяне больш цікавіць, наколькі публічна гэты суд будзе адбывацца. Бо чым больш ён будзе публічны, тым гучней можна будзе падняць тэму палітвязьняў.
Сяргей Калякін быў яшчэ больш катэгарычным: «Глупствы гэта ўсё. Глупства! Гэта ўсё тая ж песьня, што ў мяне скралі пашпарт і таму не выпускаюць за мяжу. І тут ні пры чым гэтыя работнікі «Нафтана», іх там няма, гэта ўсё выдумкі, хітрыкі КДБ. Ніякага зыску быць ня можа, бо не існуе факту, калі б Калякін заклікаў бы да абмежаваньня тавараў «Нафтану» ці ўвогуле калі-небудзь казаў пра «Нафтан» ці пра Мазырскі НПЗ. Улады гуляюць у гульні. Яны баязьліўцы. Ня могуць шчыра выказацца пра тое, што яны парушаюць правы грамадзянаў, у тым ліку мае.
Ну якія работнікі «Нафтану» ведаюць маё прозьвішча і што я кажу?Гэта проста за вушы прыцягнулі людзей, проста згвалцілі іх, каб яны гэта зрабілі. Альбо ў гэтых людзей з розумам нелады, альбо ў іх сур’ёзныя праблемы з уладамі і ўлады могуць ім маніпуляваць. Ніякі нармальны чалавек у суд зьвяртацца ня будзе, бо ў яго няма ніякіх доказаў».
Цяпер чытаюць
Вызваленыя беларускія палітвязні паразмаўлялі з Зяленскім9
Каментары