У адносінах Беларусі з Захадам «акрэсліліся пэўныя тэндэнцыі і працэсы, якія павінны выспець». Пра гэта заявіў 3 мая на брыфінгупрэс-сакратар беларускага МЗС Андрэй Савіных у адказ на просьбу журналістаў пракаментаваць факт вяртання ў Мінск паслоў краін Еўрасаюза.
«Я думаю, што апошнім часам мы гаворым дастаткова шмат па гэтым пытанні», — заявіў Савіных. І дадаў: «Мы ў свой час вернемся да абмеркавання гэтай тэмы».
Нагадаем, на працягу апошняга тыдня ў Мінск вярнуліся паслы краін Еўрасаюза, якія пакінулі беларускую сталіцу ў выніку дыпламатычнага скандалу. Ён здарыўся пасля таго, як беларускія улады 28 лютага рэкамендавалі кіраўнікам прадстаўніцтва ЕС і пасольства Польшчы выехаць з Беларусі для кансультацый са сваім кіраўніцтвам. Беларускія паслы былі адкліканы з Варшавы і Бруселя. На такі крок Мінск пайшоў пасля прыняцця Саветам міністраў ЕС рашэння аб пашырэнні санкцый у дачыненні да Беларусі. У знак салідарнасці са сваімі калегамі ў канцы лютага — пачатку сакавіка Беларусь пакінулі ўсе паслы краін Еўрасаюза.
***
23 красавіка Савет міністраў замежных спраў ЕС абмеркаваў беларускае пытанне на пасяджэнні ў Люксембургу. Прывітаўшы вызваленне апазіцыйных палітыкаў Андрэя Саннікава і Дзмітрыя Бандарэнкі (палітзняволеныя былі вызвалены 14–15 красавіка), члены савета падкрэслілі неабходнасць вызвалення і рэабілітацыі ўсіх палітзняволеных.
Паводле інфармацыі польскага агенцтва ПАП, на пасяджэнні міністр замежных спраў Літвы Аўдронюс Ажубаліс выказаў асцярогу, што вяртанне паслоў у Мінск можа быць выкарыстана Аляксандрам Лукашэнкам ў прапагандысцкіх мэтах. Літоўскі міністр прапанаваў ЕС выступіць з заявай наконт вяртання дыпламатаў у Беларусь, аднак гэтая ініцыятыва не знайшла падтрымкі ў іншых еўрапейскіх міністраў.
Еўрапейскія паслы пачалі вяртацца ў Мінск 25 красавіка. Ад каментарыяў яны адмаўляюцца.
Цяпер чытаюць
81‑гадовую маці аўтарытэта Скітова з «Бабулінай крынкі» кінулі ў СІЗА КДБ, каб ён нарэшце загаварыў8
Каментары