18 лістапада жыхар Гомеля Станіслаў Яленскі вяртаўся з Украіны праз памежны пункт пропуску «Новая Гута», дзе быў спынены памежнікамі для пільнага надгляду. Прычынай для гэтага стала аплікацыя на заднім шкле аўто — мядзведзік з парашутам, якія трымае ў руках цыдулку «Привет ПВО!».
«Да тавараў, якія я вёз з Чарнігава, у памежнікаў не было ніякіх прэтэнзій. Вартавы мяжы зацікавіўся мядзведзікам і спытаўся, што азначае гэтая аплікацыя? Я адказаў, што я з’яўляюся добраахвотным памочнікам памежнікаў па выяўленні нізка лятаючых самалётаў і пры частым перасячэнні мяжы падчас стаяння ў чэргах сачу за паветранай прасторай, каб вораг не пранік на нашу тэрыторыю», — патлумачыў Станіслаў Яленскі.
Тлумачэнні, відаць, не спадабаліся памежніку, бо той выклікаў начальніка змены, і аўтамабіль гамельчука адагналі для таго, каб разабрацца.Разборкі заключаліся ў тым, што прыйшоў іншы памежнік з фотаапаратам і ва ўсіх ракурсах сфатаграфаваў медзведзяня на заднім шкле аўтамабіля. «Я казаў, што, маўляў, сфатаграфуйце і мяне з маім мішкам — гэта ж я яго прыручыў, але памежнікі адмовіліся», — зазначыў кіроўца.
Ён дадаў, што пакрыўдзіўся на памежнікаў, якія не ацанілі яго парыў добраахвотнага наглядальніка за паветранай прасторай.
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі2121
Каментары