сустрэча Навіцкі—Касьянаў
Плян па ілюзіях выкананы
Расея і Беларусь падпісалі “Плян сумесных дзеяньняў па ўвядзеньні адзінай грашовай адзінкі на пэрыяд 2001—2005 г.”. Згодна з назвай дакумэнту, яго рэалізацыя павінна была пачацца яшчэ летась. Вось гэтак “імпэтна” Беларусь інтэгруецца з Расеяй.
У пляне, падпісаным старшынямі ўрадаў дзьвюх краін Міхаілам Касьянавым і Генадзем Навіцкім, старшынём Цэнтрабанку Расеі Сяргеем Ігнацьевым і намесьнікам старшыні Нацыянальнага банку Беларусі Паўлам Калавурам, прадугледжваецца, што з 2005 г. расейскі рубель зробіцца законным плацежным сродкам на тэрыторыі Беларусі, а з 2008 г. зьявіцца нейкая адзіная валюта саюзнай дзяржавы. Аднак як менавіта дасягнуць валютнага аб’яднаньня, два саюзьнікі ўяўляюць па-рознаму. Наш Нацбанк дагэтуль лічыць непрымальным, каб толькі расейскі ЦБ атрымаў права на эмісію саюзнай валюты.
Менск прапаноўваў стварыць эмісійную раду, у якой Нацыянальны банк Беларусі меў бы свой голас. Нават прапаноўвалі разьмясьціць яе ў Смаленску — каб саюзныя грошы друкаваліся на расейскай тэрыторыі, але бліжэй да Менску. Расейскі Цэнтрабанк пра гэта нават чуць не хацеў, і адстаўка Віктара Герашчанкі ў гэтым сэнсе нічога не зьмяніла.
Дарэчы, меркавалася, што ў дзень падпісаньня “Пляну…” дзяржсакратар саюзнай дзяржавы Павел Барадзін, першы намесьнік міністра юстыцыі Расеі Юры Дзёмін і намесьнік кіраўніка адміністрацыі прэзыдэнта Беларусі Леанід Козік прадставяць двум прэм’ерам праект канстытуцыйнага акту саюзнай дзяржавы. Аднак удзельнікі сустрэчы так нічога і ня ўбачылі.
Эканамічная інтэграцыя Расеі і Беларусі ідзе марудна. “Магчыма, і пасьля падпісанага сёньня пляну дзеяньняў у беларускіх улад застануцца ілюзіі, што адзінай валютай саюзнай дзяржавы зробіцца не расейскі рубель, а нейкая адмысловая грашовая адзінка”, — іранічна заўважае з гэтай нагоды ўплывовая расейская інтэрнэт-газэта “Газета.ru”.
Як ні сьмешна, такія ілюзіі сапраўды застаюцца.
Б.Т.
Цяпер чытаюць
Дзеці злізвалі з бруднай падлогі пралітае малако. Якой пабачыў замежнік Беларусь, спустошаную расійскімі і шведскімі войскамі ў час Паўночнай вайны1111
Каментары