Аўтарка «экспертызы», паводле якой Севярынца адлічылі з ПЭНа: Гэта была не экспертыза, а прыватны каментар
Рада ПЭН-Цэнтра 29 кастрычніка адлічыла з шэрагаў арганізацыі палітыка і пісьменніка Паўла Севярынца. У афіцыйным тлумачэнні, чаму Севярынца адлічылі з ПЭНа, значыцца такі пункт: «Публічна, сістэматычна дыскрымінавалася сацыяльная група ЛГБТК+, што пацвярджаецца вонкавай экспертызай і парушае п.3 Хартыі Міжнароднага ПЭН-Клуба, які абавязвае сяброў нашай арганізацыі «ўсімі сіламі змагацца супраць любых праяваў нянавісці».
Кіраўніцтва ПЭН-Цэнтра спасылаецца на вонкавую экспертызу і пакідае спасылку на гэтую працу.
Экспертызу правяла Віялета Ермакова, удзельніца ініцыятывы «Журналісты за талерантнасць».
Што гэта за суполка? Яна праводзіць пастаянныя маніторынгі ўсяго, датычнага да ЛГБТ-супольнасці і «мовы варожасці». Вынікі часцяком крытыкуюцца журналісцкай супольнасцю за спрэчныя трактоўкі.
Чытайце. «Журналісты за талерантнасць» заклікаюць «Нашу Ніву» не цытаваць патрыярха Кірыла, Трампа і Дашкевіча
«Наша Ніва» звярнулася па каментар да Віялеты Ермаковай, каб яна патлумачыла, як і чаму рабіла гэтую экспертызу.
«А гэта не была «экспертыза». У мяне ў прыватным парадку ўзялі каментар. Каму і навошта патрэбна было надаваць яму статус экспертызы, я не ведаю. Наколькі я разумею, пытанне аб выключэнні Паўла Севярынца з ПЭНа прымаецца галасаваннем пасля абмеркавання. Мой каментар я разглядаю як рэпліку ў гэтым абмеркаванні», — сказала спадарыня Ермакова.
«Экспертызу» ў Віялеты Ермаковай замаўляла першая намесніца старшыні ПЭН-Цэнтра Таццяна Нядбай.
«Па парадзе калегаў з БАЖа я звярнулася да арганізацыі «Журналісты за талерантнасць» з просьбай прааналізаваць артыкул Паўла Севярынца. Атрымала гэтую ацэнку тэкста ў адказ і палічыла гэта экспертызай у тым сэнсе, што гэта аналіз, разгляд пытання эксперткай.
Дапускаю, тое, што з'яўляецца экспертызай у юрыдычным сэнсе («сапраўдная экспертыза»), магло б утрымліваць больш навуковасці, але наўрад ці змянілася б сама мадальнасць ацэнкі. Таму гэтага каментара эксперткі са знешняй арганізацыі нам дастаткова для падмацавання нашай пазіцыі», — адказала Таццяна Нядбай.
Старшыня БАЖ Андрэй Бастунец запэўніў «НН», што ніхто з ПЭНа не звяртаўся да кіраўніцтва журналісцкай арганізацыі з пытаннем пра экспертызу. «У нас 1300 сяброў. Магчыма, Ермакову параіў нехта з тых людзей, хто праводзіў кампанію па выкараненні мовы варожасці. Калі каротка, то яны самі гэта прызнаюць, што тэрмін «мова варожасці» яны ўжываюць вельмі шырока. Не з праваабарончага гледзішча, а з сацыялагічнага», — патлумачыў ён.
Каментары