Чаму ў другім квартале года смяротнасць вырасла на 5500 чалавек? Мінздароўя маўчыць
Белстат у 2020 годзе, у адрозненне ад мінулых гадоў, не апублікаваў статыстыкі пра смяротнасць у першым паўгоддзі гэтага года. Але гэтая статыстыка ўсплыла ў публікацыі ААН, куды яе перадае Беларусь.
Лічбы шакуюць.
У чэрвені 2020 рост смяротнасці проці мінулага чэрвеня склаў 3753 чалавекі.
У маі 2020 рост смяротнасці проці мінулага мая склаў 1309 чалавек.
У красавіку 2020 рост смяротнасці проці мінулага красавіка склаў 543 чалавекі.
Лічбы студзеня-сакавіка ў цэлым адпавядаюць паказчыкам гадоў з нізкім узроўнем захворвання на грып і ВРВІ, які адзначаўся гэтай зімой. Але лічбы смяротнасці ў маі-чэрвені абсалютна беспрэцэдэнтныя. Такіх не назіралася ні разу за ўсе часы, пакуль на сайце ААН вядзецца падрабязная статыстыка — з 1980 года.
Зыходзячы з гэтых лічбаў,
смяротнасць за красавік—чэрвень перавысіла сярэднюю за апошнія 5 гадоў прыкладна на 5500 чалавек. Верагодна, гэта і ёсць рэальны вынік каранавірусу ў нашай краіне.
Ён жахлівы: сувымерны з краінамі і рэгіёнамі свету, дзе ўдар Covid-19 быў найгоршы.
Па афіцыйных звестках, станам на 30 чэрвеня ад Кавіду ў Беларусі памерла толькі 398 пацыентаў — амаль у 14 разоў менш, чым прырост статыстыкі смяротнасці за красавік-чэрвень.
Па тых жа афіцыйных звестках, ад 1 ліпеня да сённяшняга дня памерла яшчэ 307 пацыентаў з Кавід.
Статыстыка смяротнасці ад Кавід, як і статыстыка пнеўманій па асобных раёнах і бальніцах засакрэчана ад красавіка, таму СМІ ніяк не маглі яе праверыць. Ва ўсіх іншых еўрапейскіх краінах статыстыка Кавід не была засакрэчана. У большасці еўрапейскіх краін каранцінныя меры па Кавід былі нашмат стражэйшыя, што стала тэмай для вялікай палемікі ў нашай краіне.
«Наша Ніва» запытала ў Міністэрстве аховы здароўя, чым яны тлумачаць рост смяротнасці ў другім квартале на 5500 чалавек. Адказу на запыт мы не атрымалі.
Цяпер чытаюць
Хрыста Грозеў: Мельнікава як мінімум год, а хутчэй за ўсё, паўтара перадавала інфармацыю беларускім спецслужбам4
Каментары