Паводзіны кошкі, перавозка насарогаў і прыліплая да асфальту гумка. За што далі сёлета Шнобелеўскую прэмію
У Гарвардскім універсітэце 9 верасня прайшла цырымонія ўручэння Шнобелеўскай прэміі, якую даюць за самыя абсурдныя дасягненні. Мерапрыемства зноў прайшло ў анлайн-фармаце з-за каранавіруса. Пераможцам уручаюць «грашовую прэмію» ў выглядзе банкноты ў 10 мільярдаў зімбабвійскіх долараў — падробленай купюрай, паведамляе Бі-бі-сі.
Прэмію па біялогіі атрымала Сюзан Шэц (Швецыя) — за «аналіз розных варыянтаў мяўкання, буркатання, віскаў, стогнаў, шыпення і іншых спосабаў камунікацыі, якія кошкі выкарыстоўваюць для кантакту са сваімі ўладальнікамі».
Экалогія: атрымалі Лэйла Сатары, Альба Гюлен, Анхела Відэль-Верду і Мануэль Поркар (Іспанія, Іран) — яны збіралі прыліплую да тратуараў жавальную гумку і на працягу трох месяцаў вывучалі, як змяняецца яе хімічны склад і якія бактэрыі з'яўляюцца на яе паверхні.
Прэмію па хіміі падзялілі адразу 10 навукоўцаў, якія замяралі склад паветра ў кіназалах і выявілі, што канцэнтрацыя пэўных рэчываў там змяняецца ў адпаведнасці з тым, што адбываецца на кінаэкране, і залежыць ад эмацыйнай рэакцыі гледачоў — на сцэны гвалту, нецэнзурную лаянку і г.д.
Лаўрэатам прэміі па эканоміцы стаў Паўло Блавацкі, які высветліў, што ўзровень успрымання карупцыі ў той ці іншай краіне моцна карэлюе з узроўнем атлусцення мясцовых чыноўнікаў міністэрскага ўзроўню.
Прэмію па медыцыне атрымалі чацвёра навукоўцаў з Германіі, Турцыі і Брытаніі, якія даказалі, што аргазм можа прачышчаць нос не горш, чым кроплі ад насмарку.
Шнобелеўскую прэмію міру заваявалі амерыканцы Ітан Бесерыс, Стывен Нэйлуэй і Дэвід Кэры, якія праверылі — на спецыяльных муляжах, не на людзях — сваё меркаванне, што бароды і вусы ў мужчын першапачаткова прызначаныя для таго, каб абараняць скуру і косці ад удараў у бойцы. Гіпотэзу, на думку даследчыкаў, удалося даказаць: як паказалі эксперыменты, валасы паглынаюць да 37% энергіі ўдару.
Прэмія па фізіцы дасталася групе навукоўцаў з Нідэрландаў, Італіі, Тайваня і ЗША за працу пад назвай «Заснаванае на фізіцы мадэляванне і прадстаўленне даных аб папарным узаемадзеянні пешаходаў». Мэтай працы было высветліць, як пешаходам атрымоўваецца пазбягаць пастаянных сутыкненняў з іншымі пешаходамі.
Нарэшце, Шнобелеўскую прэмію ў галіне транспарту атрымалі адразу трынаццаць навукоўцаў з Намібіі, ПАР, Танзаніі, Бразіліі, Брытаніі і ЗША за даследаванне, ці бяспечна пераносіць чорных насарогаў па паветры ўверх нагамі.
Гэта насамрэч зусім не абсурднае пытанне: менавіта так, прывязанымі за ногі да верталёта, перавозяць насарогаў паміж арэаламі пасялення (каб яны памнажаліся і не выраджаліся) у афрыканскіх запаведніках, і ветэрынары разам з Намібійскага міністэрствам навакольнага асяроддзя зацікавіліся, ці не шкодзіць такі спосаб перавозкі здароўю жывёл. Высветлілася, што зусім не шкодзіць.
Што азначае загадкавы код R99 у прычынах смерці Уладзіміра Макея і Вітольда Ашурка?5
Каментары