«Хуткая ехала амаль дзве гадзіны, сказалі, шмат выклікаў у чарзе, за сотню. Калі прыехалі — зрабілі ўкол і з'ехалі», — піша нам чытач.
«Сёння дзве гадзіны чакалі брыгаду на пацверджаны кавід», — піша іншы.
«У таварыша захварэў сын, кавід. Хуткая не паехала, сказалі выклікаць, калі будзе зусім кепска, а ў панядзелак, можа быць, зойдзе ўчастковы доктар», — расказвае яшчэ адзін.
Мы звязаліся з медыкам хуткай дапамогі. Яна пацвердзіла, што сітуацыя напружаная.
«З верасня пайшоў вялікі рост захворвання, пры гэтым прышчэпленых хварэе мала і лёгка. У асноўным тыя, хто не вакцынаваўся. Падстанцыі загружаны візітамі.
Звычайна рэальнасць працы такая, што ты не выходзіш з пад'езда, каб адразу ж ехаць на іншы адрас, ты паспяваеш вярнуцца на падстанцыю і там чакаеш, часам да гадзіны чакаеш.
Цяпер жа, у эпідэмію, на падстанцыі мы зусім не бываем, толькі выклікі. Пры гэтым такога выкліку як «каранавірус» ужо не існуе. Едуць толькі на канкрэтныя скаргі суправаджальныя — высокая тэмпература, чалавек задыхаецца, нізкая сатурацыя і гэтак далей.
Выклікаў вельмі шмат, таму камусьці даводзіцца чакаць, гэта натуральна. Выклікі ёсць тэрміновыя і экстранныя. Экстранныя — аварыі, пажары, інсульты, інфаркты, чалавек без прытомнасці, не можа дыхаць і гэтак далей. Яны першыя ў чарзе, колькі б не было тэрміновых, прыярытэт заўсёды экстранны.
Пры гэтым некаторыя людзі злоўжываюць і выклікаюць на тэмпературу 37, таму што яму проста лянотна ехаць у паліклініку», — сказала доктар.
У некаторых паліклініках тым часам профільных медыкаў вымушана загружаюць работай з хворымі на карону, бо персаналу бракуе пры ўзрослай колькасці хворых.
Пры гэтым, адзначаюць медыкі, хоць гэтая хваля выглядае большай за леташнюю, працаваць троху прасцей, таму што на прыёмы не ходзяць больш людзі-«кантакты».
З бальніц таксама даходзяць трывожныя навіны аб узроўні загружанасці рэанімацый і колькасці хворых. Дактары акцэнтуюць увагу, што прышчэпленыя хварэюць вельмі рэдка і ў лёгкай форме, нагадваюць пра неабходнасць прышчапіцца.
«Наша Ніва» сочыць за тэмай.
Чытайце таксама:
«За два тыдні верасня прыняла столькі ж пацыентаў, колькі ў студзені. І гэта яшчэ не пік». Медыкі і пацыенты пра чацвёртую хвалю кавіду
