«Mety ŭ nas tyja ž»

Stenahrama pres-kanferencyi Alaksandra Vajtoviča, Vasila Lavonava, Valerja Frałova 8 vieraśnia.

Alaksandar Vajtovič: Naśpieła nieabchodnaść abjadnańnia našych siłaŭ dziela baraćby za kankretnyja vyhody. U kastryčniku adbudziecca Kanhres demakratyčnych sił pavodle pracedury, jakuju ŭchvaliła partyjnaja častka apazycyi. Budzie vybrany adziny kandydat ad partyjnych struktur. Ale, pa vialikim rachunku, častka niepartyjnaj apazycyi nia ŭklučana ŭ hety praces. I heta nia naša vina, a vynik arhanizacyi pracesu, kali, naprykład, mianie ci Ŭładzimiera Kołasa nie ŭklučyli ŭ ahulny śpis. Partyi nas adšturchnuli. Ale heta — u minułym. Treba dziejničać supolna, my padpisali pahadnieńni, a taksama zvarot da hramadzian krainy.

Naša meta — źmianieńnie ładu ŭ krainie z dyktatury na demakratyju, kab hramadztva mahło samo ŭdzielničać ŭ hramadzkim i palityčnym žyćci. Naša najbližejšaja zadača — kab nielehitymny ŭdzieł Łukašenki ŭ vybarach nie adbyŭsia. Bo heta budzie mieć ciažkija vyniki dla krainy. Budziem časta źbiracca, abmiarkoŭvać plany raboty, taktyčnyja j stratehičnyja zadačy.

Vasil Lavonaŭ: Mety ŭ nas tyja ž, što ŭ «Piaciorki» j «Dziasiatki», — stvareńnie narmalnych, demakratyčnych pryncypaŭ kiravańnia krainaj. U nas ź imi roznyja padychody j metady nakont taho, jak dasiahnuć zadač, a taksama roznaje bačańnie taho, što budzie dalej. Bo ŭdzieł u vybarach pa hetych praviłach — heta lehitymizacyja čarhovaha pieravybrańnia Łukašenki. U elektaratu niama paniaćcia, što padpisali Vajtovič, Lavonaŭ, Milinkievič ci Chadyka. Vybary adbylisia. Apazycyja ich čarhovy raz pravaliła. Užo vidavočna, što minimum dva da adnaho adzinaha buduć jašče. Jak ludziam vyznačać klasyfikacyju, dzie adziny-dvuadziny? Tak, skažacie, va Ŭkrainie abaranili vyniki hałasavańnia. Ale ž toje byli realnyja vyniki! A nam što z našymi adzinymi rabić, da jakich dadaduć jašče niekalki padstaŭnych?

Treba vyrašyć stratehičnuju zadaču, vypracavać adzinuju stratehiju. Pra detali ciapier havaryć niama sensu. U krasaviku Łukašenka j Pucin damovilisia pravieści ŭ listapadzie pasiadžeńnie Vyšejšaha dziaržsavietu j padpisać Kanstytucyjny akt. Daj boža, kab jaho nie było. Ale ŭ mianie jość pradčuvańnie, što my da čarhovaha referendumu tak i budziem hulacca ŭ svajoj piasočnicy.

Valery Frałoŭ: My zadavoleny, što «Piaciorka» praviała rajonnyja schody. Heta patrebnaja j karysnaja sprava, hety praces treba vitać. Ale ŭ vyniku atrymajecca kandydat ad partyjnych struktur. A što ž Vybarčy kodeks? A jak ža niaŭdzieł u vybarach Łukašenki — heta ž i jość hałoŭnaje, bo biaz hetaha ŭsie ruchi traciać usialaki sens! Aproč sustreč «na vyšejšym uzroŭni», aproč kansultacyj treba rabić niešta realnaje. Niejkuju ahulnuju spravu, jakaja b zmahła być stryžniem, što abjadnaje demakratyčnuju supolnaść našaj krainy. Mnie persanalna daručana zajmacca praviadzieńniem respublikanskaha referendumu z čatyrma pytańniami:

1) źmieny ŭ Vybarčy kodeks;

2) skasavańnie kantraktnaj systemy;

3) źmianieńnie schiemy apłaty kamunalnych pasłuh;

4) padtrymka małoha j siaredniaha pradprymalnictva.

Pad kožnaje pytańnie ŭzhodnieny j raspracavany zakony. Jość adkaz Łazavika z CVK. Jość 260 nataryjalna zavieranych i padadzienych u CVK zajaŭ ad hramadzian, a da kanca vieraśnia ich budzie padadziena ad 1,5 da 2 tysiač. Heta buduć ludzi — siabry inicyjatyŭnaj hrupy pa praviadzieńni referendumu, paśla hetaha raspačniecca vialikaja infarmacyjna-ahitacyjnaja kampanija. Heta ahulnaja sprava, pytańni dla ŭsich cikavyja. Heta stryžań, jaki dazvolić kansalidavać usie płyni ŭ krainie.

— Što nakont padtrymki Rasiejaj vašych inicyjatyŭ?

VF: Padtrymka jość. Možna pajści ŭ partyzanski atrad, možna vyjści na płošču. Ale my raźličvajem dziejničać u miežach pravavoha pola, choć, nia vyklučana, daviadziecca abaraniać vyniki vybaraŭ i referendumu.

— Što Vy budziecie rabić, kali Łukašenka ŭsio ž nie pahodzicca nia ŭdzielničać u vybarach?

VF: My nia budziem rychtavacca da dnia, kali jon pastavić beteery j tanki.

AV: Paśla pieršaha etapu treba iści na etap rehistracyi kandydataŭ u prezydenty, a paśla hetaha sadzicca i analizavać sytuacyju.

VF: Robim kroki, kab da momantu vybaraŭ Łukašenka ŭžo nia moh udzielničać ŭ ich. Lavonaŭ byŭ sakratarom abkamu, Vajtovič — prezydentam Akademii navuk i śpikieram, ja — hienerał. Ludziej natchniaje , što nie palitykany zajmajucca palitykaj, a ludzi, jakija prajšli žyćciovy šlach i paćvierdzili svoj patencyjał.

AV: Pa Rasiei. Kali stanavicca na pazycyi rasiejskaha isteblišmentu, dyk ciapier niavyhadna kazać «tak» ci «nie», lepiej trymać Łukašenku na viaroŭcy ŭ niaviedańni i «patresvać», vyrašajučy adnačasova svaje zadačy. Budučynia ŭ tym, kab budavać demakratyčnaje hramadztva. My nikudy ad Rasiei nie padzieniemsia. Chto b ni pryjšoŭ, jon pavinien budzie heta ŭličvać.

VF: Na praciahu miesiaca budzie viadoma, ź jakim uzroŭniem my sustrakajemsia i z kim znachodzim parazumieńnie.

— Dyk Vy ŭžo kazali letaś, što jość padtrymka i što budzie refarmavany Vybarčy kodeks.

VF: Šlach padtrymki akazaŭsia našmat bolš składany, čym padavałasia ad pačatku. Ale, jak kaža Labiedźka, «ja — palityčna aktyŭny». Dyk i my aktyŭnyja. Treba pa-filazofsku heta ŭsprymać. I kolkaść piarojdzie ŭ jakaść.

— Ci možna razumieć Vašy słovy tak, što vy prapanujecie paŭtaryć praces 2001 hodu, Vy kožny budziecie źbirać podpisy sam za siabie, a potym sprabavać damaŭlacca pamiž saboju?

AV: Ad nas budzie niechta adziny. Troch nia budzie.

— A ci nia ličycie Vy vartym źviarnucca da arhkamitetu Kanhresu demsiłaŭ razhledzieć na kanhresie i, mahčyma, uchvalić Vašu prapanovu pa arhanizacyi referendumu?

AV: Takaja prapanova dniami ŭžo padadziena. My chočam tam vystupić.

VF: Da taho ž kanhres moža vyłučyć delehataŭ na Ŭsiebiełaruski narodny schod. A to j niejkaja ferma moža. A nas tam budzie šmat. Prapanujem i paŭdzielničajem.

— Dyk a kali ŭsio ž Łukašenka na Vašy inicyjatyvy nia zvažyć, a heta całkam mahčyma, i nijakija referendumy nie dapamohuć?

VF: Pryhadvaju Švejka: «Usio było dobra, pakul u spravu nie ŭmiašaŭsia aŭstryjski hieneralny štab…» My heta zrobim.

• 0
• 0
• 0
• 0
• 0
• 0
• 0
• 0