Adam Hłobus. Adliha ŭ Vilni - videa

Paetyčny videaprajekt hramadskaj kampanii «Budźma biełarusami!» «Čorna-biełyja vieršy» raspačynaje druhi siezon. Čarhovy ŭdzielnik — Adam Hłobus.

Adliha ŭ Vilni

Adliha ŭ Vilni: płavicca ciače darožny, brudny lod,
Bliščać kamieńni ŭ ciomna-sinim bruku, ručainy brujacca,
U chmurna-biełym niebie kropački ptušynych drobnych ciełaŭ,
Nibyta mak na pirahu niaśpiečanym, jašče žyvym i drohkim,
Karunki pleśni na murach krasujuć, nibyta karty kapitanaŭ,
Raschrystanyja dzieci biez palčatak i biez šapak, bieznahodna
Biahuć pa łužynach, puskajuć z pyrskaŭ zichatkija viejary,
Usio navokał pachnie božym sokam takoj žadanaj, blizkaje viasny,
Karčmar śpiašajecca pamyć vitrynu, byccam nie adliha,
A viasna iznoŭ-nanoŭ u Vilniu nazaŭsiody zavitała.
Z maleńkich fortačak ciakuć miełodyi falkłornych pierahudaŭ,
Nibyta hudasy ź jaŭrejami jašče žyvuć u biełaruskaj Vilni.
Tak, judasy i hudasy šče hrajuć na skrypačkach i dudačkach svaich.
Tak, pan Adaś Mickievič usio jašče čytaje Hańnie Krymskija saniety,
A Juzik Brocki na maleńkaj kuchni marmyča nierazborlivyja słovy.
Junak Maksim, katory Bahdanovič, šukaje bieznazoŭnaje kachańnie.
Pa adližnaj Vilni paezija ciače pa ščylnaj čyrvani dachoŭki,
Ciače pa dužych viežach u zavuzkija, kryvyja, našy vułki.
Smak słoŭ jaŭrejskich, polskich, našych čuvać u załatym pavietry.
U arkach prachadnych dvaroŭ siadziać katy murłatyja, jak budy,
Siadziać za santymietr ad marcavańnia krykuščaha i viesnavoha.
Žančyny racšpilili vierchni huzik na futrach i zimovych palitonach.
Mužčyny suciašajucca harełkaj u ciemradzi paŭsuviarennych baraŭ,
Jany nie čujuć pach viasny, jany nie viedajuć i pra adlihu ŭ Vilni.

* * *

Adam Hłobus — biełaruski piśmieńnik, mastak, vydaviec. Pracuje ŭ halinie paezii i prozy. U druku pačaŭ vystupać ź vieršami ŭ 1981. Vieršy i apaviadańni Adama Hłobusa pierakładzieny na ŭsie asnoŭnyja movy śvietu. Naradziŭsia 29 vieraśnia 1958 h. u horadzie Dziaržynsku Minskaj vobłaści ŭ siamji piśmieńnika Viačasłava Adamčyka. U 1959 h. z baćkami pierajechaŭ u Minsk. Vučyŭsia ŭ Minskaj mastackaj vučelni na piedahahičnym adździaleńni. U 1983 skončyŭ mastackaje adździaleńnie Biełaruskaha dziaržaŭnaha teatralna-mastackaha instytuta. Pracavaŭ čarciožnikam, mastakom-restaŭrataram, mastakom-afarmicielem, redaktaram, žurnalistam. Adzin z zasnavalnikaŭ litaraturnaha tavarystva «Tutejšyja». Ciapier zajmajecca vydavieckaj spravaj (vydaviectva «Sučasny litaratar»).

• 0
• 0
• 0
• 0
• 0
• 0