Mastacki tekstyl u Połacku

17 žniŭnia ŭ Połackaj karcinnaj halerei adkryłasia ŭnikalnaja mižnarodnaja vystava – Mastacki tekstyl (Biełaruś-Litva). U ekspazicyi - pracy 9 litoŭskich i 12 biełaruskich mastakoŭ. Ź litoŭskaha boku arhanizatarami prajekta vystupiła Tekstylnaja hildzija, ź biełaruskaha – Połackaja karcinnaja halereja. Siarod udzielnikaŭ vystavy viadomyja majstry: I. Šmidtene, Ł. Ionikie, Ł. Hutaŭskene, S. Katkova, N.Piluzina, Ł. Skrypničenka, Ł. Hustava, Ł. Piatrul, T. Kozik i inš.

U dzień adkryćcia adbyŭsia majstar-klas pa batyku, jaki pravodziła staršyńka Tekstylnaj hildzii Jałanta Šmidtene. U majstar-klasie taksama ŭdzielničali biełaruskija mastački Śviatłana Katkova, Taciana Kozik i Maryetta Hołubieva.

Tekstylnaja hildzija abjadnoŭvaje mastakoŭ-tekstylščykaŭ Litvy. Voś što pra svaju tvorčuju arhanizacyju raspaviała Jałanta Šmidtene: «Naša arhanizacyja mastakoŭ pa tekstylu usioj Litvy, naš ofis i naša halereja znachodziacca ŭ Koŭnie. My vystaŭlajecca nia tolki ŭ pamiaškańniach, halerejaŭ, ale i pad adkrytym niebpm, naprykład, u zamkach, tam, kudy prychodziać ludzi i dzie jany mohuć zachapicca našym mastactvam».

Litoŭskim mastakam vielmi spadabałasia połackaja mastackaja halereja. Hety mastacki muzej znachodzicca ŭ staražytnym korpusie byłoha jezuickaha kalehijuma i maje vielmi bahatuju kalekcyju biełaruskaha vyjaŭlenčaha mastactva druhoj pałovy 20 stahodździa. Heta badaj adzin z samych lepšych u Biełarusi muzej sučasnaha ajčynnaha vyjaiaŭlenčaha mastactva.

Padčas majstar-kłasa prafejsijnyja mastački nia tolki pakazvali jak naradžajucca tvory mastactva na tkaninach, ale i vučyli hetamu majsterstvu navučencaŭ miascovaj mastackaj škoły. Havoryć adna z udzielnic majstar-klasa połackaja mastačka Taciana Kozik: «Jałanta vykanała vialikuju pracu na jatvabie, pracujučy, padrabiazna tłumačyła, što i jak robić. A my, ja, Śviatłana Katkova i Maryetta Hołubieva, poruč pracavali tvorča. Jatvab i farby atrymali navučency miascovaj mastackaj škoły, jakija zmahli atrymać pieršy ŭrok hetaha majsterstva».

Pracy, jakija vykanali mastaki, zastalisia ŭ padarunak połackamu muzeju. Jałante Šmidtene paviedamiła, što ŭ Litvie siońnia znoŭ vielmi papularny mastacki tekstyl: «Našyja maładyja mastaki šmat jeździać pa śviecie i pryvieźli novyja technalohii, materyjały, farby. Mastacki tekstyl zachapiŭ nia tolki mastakoŭ, ale i prosta amataroŭ što-kolviečy zrabić pryhožaje na tkaninie».

Biełaruskija i litoŭskim mastaki damovilisia pravieści šerah ahulnych mastackich prajektaŭ.

• 0
• 0
• 0
• 0
• 0
• 0
• 0
• 0