Prosta chaciełasia kahości zabić: junakoŭ-zabojcaŭ pieršakurśnika asudzili na 25 i 15 hadoŭ

Homielski abłasny sud siońnia vynies prysud pa spravie ab žorstkim zabojstvie studenta pieršaha kursa Biełaruskaha dziaržaŭnaha univiersiteta transpartu. Adzin z udzielnikaŭ złačynstva prysudžany da 25 hadoŭ pazbaŭleńnia voli, a druhi, jakomu tolki 5 maja spoŭniłasia 18 hadoŭ, - da 15 hadoŭ źniavoleńnia.

Zabojstva 19-hadovaha hamialčanina było ździejśniena 20 lipienia 2012 h., padazravanych zatrymali praź niekalki dzion. Imi apynulisia 19-hadovy navučeniec Homielskaha miedycynskaha kaledža i 17-hadovy navučeniec Homielskaha kaledža mašynabudavańnia. Abodva raniej nie sudzili. Pavodle abvinavačańnia, maładyja ludzi ździejśnili zabojstva z asablivaj žorstkaściu hrupaj asob, razboj, kradziež asabistych dakumientaŭ, a taksama naŭmysnaje źniščeńnie abo paškodžańnie majomaści ahulnaniebiaśpiečnym sposabam.

Zhodna z abvinavačvańniem, maładyja ludzi ŭčynili zabojstva z asablivaj žorstkaściu hrupaj asob (art. 139 KK), razboj (art. 207 KK), kradziež asabistych dakumientaŭ (art. 378 KK), naŭmysnaje źniščeńnie abo paškodžańnie majomaści, učynienyja ahulnaniebiaśpiečnym sposabam (art. 218 KK).

Abvinavačvanyja, adzin ź jakich byŭ raniej znajomy z achviaraj, pozna viečaram paprasili studenta puścić ich u kvateru prasochnuć, bo na vulicy byŭ doždž, zatym žorstka zabili jaho z metaj abrabavańnia.«Zdabyčaj» złačyncaŭ stali 1,3 miljona rubloŭ, stary noŭtbuk, mabilnyja telefony, lichtaryki, parason, škarpetki, čaraviki.

Zabojstva jany spłanavali zahadzia i padrychtavalisia da jaho: uziali nažy, nabyli ŭ aptecy palčatki, hlukozu (pa tłumačeńni abvinavačvanych, kab «paskoryć reakcyju»), kupili ŭ mahazinie pierac (kab sabaka nie ŭniuchaŭ śled).

Paśla zabojstva abvinavačvanyja sprabavali schavać ślady złačynstva — pracierli pavierchni ŭ kvatery achviary harełkaj, pasypali ŭsio piercam, a kali sychodzili adkryli ŭsie kanforki hazavaj plity i duchoŭki, vyklučyli ŭsie elektraprybory, kab, pavodle słoŭ abvinavačvanych, «zahadzia nie detaniravała».

Adnak susiedzi zahinułaha adčuli pach hazu i vyklikali avaryjnuju słužbu.

27 lutaha na sudzie pry dopycie abvinavačvanyja poŭnaściu pryznali svaju vinu.

Jany źbiralisia zabić jaho žonku i dzicia i zavałodać majomaściu. Ale žonka dydžeja nie adčyniła im dźviery, tady maładyja ludzi adpravilisia zabivać, pavodle słoŭ niepaŭnaletniaha, jaho babulu i dziadulu. Tam im taksama nie adčynili dźviery.

Paśla hetaha, kupiŭšy ŭ aptecy palčatki, hlukozu, uzbroiŭšysia nažami, jany pajšli da znajomaha studenta, kab zabić jaho i zavałodać majomaściu.

Starejšy z abvinavačvanych biŭ achviaru nahami, a małodšy pieryjadyčna praviaraŭ puls, paviedamlajučy, ci žyvy jašče chłopiec. Zatym 19-hadovy abvinavačvany dušyŭ ručnikom studenta, paśla — cisnuŭ nahoj na šyju, pakul jon nie pamior.

19-hadovy abvinavačvany vučyŭsia ŭ miedycynskim kaledžy, pavodle jaho słoŭ, zachaplaŭsia psichałohijaj, šmat čytaŭ, raźbiraŭsia ŭ miedycynie, prachodziŭ praktyku pa śpiecyjalnaści «fielčar-akušer», zajmaŭsia parusnym sportam i turyzmam.

Na sudzie jon śćviardžaŭ, što zabojstvy z metaj abrabavańnia — heta byli «fantazii i kazki» jaho niepaŭnaletniaha chaŭruśnika, a jon tolki «padtrymlivaŭ hetyja fantazii». Ale, pavodle jaho ž pakazańniaŭ, mienavita jon nanosiŭ udary i dušyŭ achviaru.

Zahinuły byŭ adzinym synam vykładčyka adnoj z himnazij Homiela, jon z załatym miedalom skončyŭ himnaziju, byŭ adnym ź lepšych studentaŭ pieršaha kursa BiełDUT.

Svajaki i siabry charaktaryzujuć jaho tolki sa stanoŭčaha boku.

Pry ŭčynieńni złačynstva abvinavačvanyja taksama vykrali miedal, atrymany chłopcam za vydatnaje zakančeńnie škoły.

• 0
• 0
• 0
• 0
• 0
• 0
• 0
• 0