Sudom Słaŭharadskaha rajona asudžany 18-hadovaja i 35-hadovy miascovyja žychary.
Pieršaja — za zabojstva na padstavie č. 1 art. 139 KK, druhi — za ŭčynieńni złačynstva, praduhledžanaha č. 2 art. 405 KK (zahadzia nie abiacanaje ŭkryvalnictva pryłady i śladoŭ asabliva ciažkaha złačynstva).
U sakaviku 2012 hoda dziaŭčyna razam z 17-hadovaj siabroŭkaj, ź jakoj jany vučylisia ŭ Słaŭharadskim prafiesijnym licei № 3, pajšli raniej z zaniatkaŭ u dom da pryjaciela asudžanaj, dzie raśpivali śpirtnoje. Viečaram viarnuŭsia haspadar doma, ź jakim jany pradoŭžyli vypivać.
Zatym pamiž dziaŭčatami zdaryłasia svarka z-za haspadara: hościa stała paprakać siabroŭku tym, što jana adbiła ŭ jaje siabra. Mužčyna supakoiŭ ich, kupiŭ im jašče śpirtnoha, a sam pajšoŭ spać. Pračnuŭsia ad krykaŭ. Jaho pryjacielka pavaliła sakurśnicu na padłohu i biła jaje hałavoj ab padłohu. Jon adšturchnuŭ jaje ad achviary, ale taja nie supakojvałasia: schapiła nož i z-za jaho śpiny naniesła ŭdar siabroŭcy ŭ vobłaść serca, u vyniku čaho śmierć nastupiła na miescy zdareńnia.
Haspadar doma daŭ zabojcy vypić i pakłaŭ jaje spać. A sam źniščyŭ ślady złačynstva: spaliŭ u piečy nož, rečy paciarpiełaj, schavaŭ cieła achviary ŭ haspadarčaj pabudovie, zamyŭ u domie ślady kryvi.
Praź niekalki dzion jon sprabavaŭ rasčlanić cieła zabitaj dziaŭčyny, ale nie zdoleŭ heta zrabić. Vykapaŭ u aharodzie jamu, u jakuju pakłaŭ trup, i zakapaŭ.
U mai minułaha hoda supracoŭniki milicyi znajšli cieła zabitaj.
Padčas papiaredniaha rasśledavańnia abvinavačanaja sprabavała pierakłaści vinu na svajho pryjaciela. Adnak padčas sudovaha razboru pryznałasia ŭ tym, što zrabiła, a taksama ŭ tym, što ahavaryła siabra z metaj, kab jon razam ź joju adbyvaŭ pakarańnie. Sam jon vinu va ŭkryvalnictvie śladoŭ i pryłady złačynstva nie admaŭlaŭ.
Sud pryznaŭ dziaŭčynu vinavataj u zabojstvie i pryhavaryŭ da vaśmi hadoŭ pazbaŭleńnia voli ŭ papraŭčaj kałonii ahulnaha režymu, a taksama da prymusovaha lačeńnia ad ałkahalizmu.
Jaje pryjaciela sud pryznaŭ vinavatym u zahadzia nie abiacanym ukryvalnictvie pryłady i śladoŭ asabliva ciažkaha złačynstva i pryznačyŭ dva hady pazbaŭleńnia voli ŭ papraŭčaj kałonii ahulnaha režymu. Pryhavor uvajšoŭ u zakonnuju siłu.
Kamientary