Mierkavanaja karyść dla zdaroŭja sardečna-sasudzistaj sistemy ŭmieranaha ŭžyvańnia čyrvonaha vina nie pieravažaje ryzyki raźvićcia raku, papiaredžvajuć vučonyja.
Vydańnie The New York Times źviartaje ŭvahu na navukovuju spravazdaču, padrychtavanuju Amierykanskaj asacyjacyjaj pa vyvučeńni raku. Jaje aŭtary adznačajuć, što niahledziačy na ahulnaje źnižeńnie śmiarotnaści ad raku, zachvorvańni na peŭnyja jaho vidy, asabliva siarod moładzi, pa nie da kanca zrazumiełych pryčynach rastuć.
Pryčyn takoha rostu moža być šmat, ale navukoŭcy źviartajuć uvahu na ŭpłyŭ ałkaholu. U spravazdačy adznačajecca, što jon pavyšaje ryzyku raźvićcia niekalkich typaŭ złajakasnych novaŭtvareńniaŭ, u tym liku płoskakletačnaha raku stravavoda, niekatorych vidaŭ raku hałavy, šyi, małočnaj załozy, raku toŭstaj kiški, piečani i straŭnika.
U pošukach adkazu na pytańnie, jak ałkahol moža spravakavać rak, vučonyja źviartajuć uvahu na jaho upłyŭ na mikrabijom kišečnika. Užyvańnie ałkaholnych napojaŭ źmianiaje kišačnyja bakteryi, jakija mohuć adyhryvać rolu ŭ raspaŭsiudžańni raku toŭstaj i pramoj kišak.
Taksama ličycca, što ŭ žančyn ałkahol pavyšaje ŭzrovień estrahienu, što moža spryjać raźvićciu raku małočnaj załozy. Admovu ad ałkaholu aŭtary nazyvajuć adnym ź niamnohich sposabaŭ, z dapamohaj jakich žančyny mohuć źnizić ryzyku hetaha zachvorvańnia.
I choć žančynam pa šmatlikich pryčynach užo daŭno nie rekamiendujecca ŭžyvać ałkahol padčas ciažarnaści, u spravazdačy pryvodzicca jašče adna: daśledavańni pakazali, što ŭžyvańnie ałkaholu padčas ciažarnaści pavialičvaje ryzyku dziciačaj lejkiemii ŭ patomstva.
Aŭtary źviartajuć uvahu, što ŭ 2019 hodzie prykładna 5,4% vypadkaŭ raku ŭ ZŠA byli źviazany z užyvańniem ałkaholu. Ale pra heta viedaje vielmi mała ludziej.
Naprykład, pra suviaź ałkaholu z ryzykaj raku małočnaj załozy, jak pakazała adno z daśledavańniaŭ, u ZŠA viedajuć mienš za tracinu žančyn va ŭzroście ad 18 da 25 hadoŭ.
Pobač z hetym u hramadstvie zamacavałasia mierkavańnie ab karyści ŭmieranych doz ałkaholu ŭ prafiłaktycy sardečna-sasudzistych zachvorvańniaŭ.
Aŭtary imknucca raźviančać hety mif i źviartajuć uvahu na vyniki bujnoha daśledavańnia, praviedzienaha na praciahu bolš čym dziesiaci hadoŭ, jakoje achapiła zvyš 135 tysiač pažyłych brytancaŭ.
Jano pakazała, što ŭmieranaje ŭžyvańnie ałkaholu nie źnižaje ryzyki sardečna-sasudzistych zachvorvańniaŭ u paraŭnańni ź jaho redkim užyvańniem. Naadvarot, ludzi, jakija ŭžyvali ałkahol u małoj i ŭmieranaj kolkaści, čaściej pamirali ad raku.
Hetyja tyčycca taksama i čyrvonaha vina.
Adna z aŭtaraŭ spravazdačy, Džejn Fihiejreda, epidemijołah ź Instytuta kompleksnaha lačeńnia raku ŭ Łos-Andželesie, adznačaje, što mierkavanyja karysnyja ŭłaścivaści čyrvonaha vina dla zdaroŭja sardečna-sasudzistaj sistemy nie pieravažajuć ryzyku raźvićcia raku.
Pavodle spravazdačy, da 40% vypadkaŭ raku źviazany z faktarami, na jakija možna paŭpłyvać. Aŭtary zaŭvažajuć, što źnizić ryzyku zachvorvańniaŭ moža skaračeńnie ŭžyvańnia ałkaholu, źmiena ładu žyćcia, admaŭleńnie ad tytuniu, padtrymka zdarovaha charčavańnia i vahi, a taksama minimizacyja ŭździejańnia škodnych rečyvaŭ.
Taksama važnym bačycca pavyšeńnie infarmavanaści nasielnictva, u tym liku praz papieradžalnyja nadpisy pra ryzyku raku na ałkaholnych napojach.
Kali Kanapackaja stała całkam padkantrolnaja Łukašenku?25
Kamientary