Stryt-artary tatalna razmalavali dvor u Mahilovie

Sioleta Mahiloŭ staŭ kulturnaj stalicaj SND i Biełarusi. Z hetaj nahody maładoje kiraŭnictva horada šukała šlachi realizacyi hetaha vysokaha statusu. U toj ža momant staličnyja chłopcy sa stryt-art supołki Signal šukali miesca dla praciahu prajekta «Must Act». U vyniku praź miascovaha aktyvista Jurasia Stukałava jany znajšli adno adnaho.

Navodzić šuchier u Mahilovie pryjechali mastaki z usioj Biełarusi. Navat Vasia Grino z kamandy AZ, jaki ŭžo daŭno žyvie ŭ Maskvie, taksama nie abminuŭ mahčymaści «zavalić» fasad piacipaviarchovika. Raźmietka dla prac takich masštabaŭ zvyčajna nanosicca z dapamohaj videaprajektara. Zrabić prajekcyju dla pracy Grino było mahčyma tolki z budynka nasuprać. Hetym budynkam akazaŭsia milicejski pastarunak. Na jaho aknie i pastavili prajektar. Milicyjanty byli tak uściešanyja pracaj mastakoŭ, što navat dazvolili im zrabić niekalki fotak ŭ «małpoŭniku».

Adnymi z chedłajnieraŭ mahiloŭskaj pierabudovy stali viciebskija majstry Duedro,

jakija 3D-vyjavaj ruki Adama skaryli sercy minakoŭ. Ad žadajučych pafotkacca na adnym z 3D-palcaŭ nie było adboju.

Pra ŭnikalnaść dośviedu takoha supracoŭnictva z uładami i pracy mastakoŭ raskazvaje adzin z arhanizataraŭ prajekta Aleh Łaryčaŭ:

Zychodziačy z dośviedu kamunikacyi z pradstaŭnikami aficyjnych uładaŭ roznych haradoŭ Biełarusi, ja mahu skazać, što prykład uzajemadziejańnia z uładami Mahilova mocna adroźnivajecca ŭ pazityŭny bok. Ad načalnika adździełu pa spravach moładzi, ideałohii i kultury Aleha Korapava nie było nijakich zahadaŭ. My pakazali tolki dva papiarednija eskizy, a astatnija pracy rabili na svoj hust, nie ŭzhadniajučy ni z kim. Nam dali kart-błanš na ŭpryhožvańnie adnaho z samych naviedvalnych rajonaŭ Mahilova.

Dziakujučy padtrymcy ad Caparol, Oma i MTBank mastaki nabyli farbu, jakoj chapiła, kab pieratvaryć zvyčajny saviecki dvoryk u niešta zusim inšaje i pakul nie vielmi znajomaje našaj krainie. Darečy, arhanizatary prajekta nie imknulisia anhažavać u jaho miascovych mastakoŭ. Ale chutka da arhanizataraŭ pačali źviartacca niekatoryja pradstaŭniki miascovaj hrafici-dvižuchi:

— Pieravažnaja kolkaść ź ich skardziłasia i ździŭlałasia: maŭlaŭ, čamu nam nie dazvalajuć, a vam dazvolili, — kaža Aleh Łaryčaŭ. — Ja adkazvaŭ, što staryja šryfty nikomu nie patrebnyja, a sapraŭdny stryt-art, zdajecca, bolš aktualny ŭ haradskoj prastory.

Siarod łakalnych majstroŭ znajšlisia i cikavyja piersanažy. Naprykład, Entani, jakomu ŭsiaho 15 hadoŭ. Na dumku darosłych mastakoŭ, jaho čakaje vialikaja budučynia. Arhanizatary vyzvalili dla jaho niekatoryja płoščy, dzie jon prajaviŭ svaje zdolnaści nie horš za inšych. Bolš za toje, padčas naniasieńnia raźmietki dla raboty Vasi Grino Entani pracavaŭ jak asistent.

Zdajecca, horad zasłužyŭ hety prajekt, bo ŭsie sprabavali zrabić usio mažlivaje dla jaho realizacyi.

• 0
• 0
• 0
• 0
• 0
• 0
• 0
• 0