24 vieraśnia 100 hadoŭ spoŭniłasia paetu Siarhieju Hrachoŭskamu. Jon naradziŭsia ŭ miastečku Nobiel Pinskaha pavieta, ale hadavaŭsia ŭ Hłusku na Mahiloŭščynie.
Skončyŭ hazietna-vydavieckaje adździaleńnie litaraturnaha fakulteta Minskaha piedahahičnaha instytuta (1935), pracavaŭ redaktaram na Biełaruskim radyjo, vykładčykam litaratury na rabfaku pry BDU.
U 1936 aryštavany supracoŭnikami NKVD i asudžany jak «člen kontrrevalucyjnaj nacyjanał-fašysckaj arhanizacyi» i za «antysavieckuju dziejnaść» da 10 hadoŭ. Niejki čas znachodziŭsia va Unženskim kancłahiery Horkaŭskaj vobłaści.
Vyzvaleny ŭ kastryčniku 1946. Praz hod — źniataja sudzimaść. Adnak u 1949 aryštoŭvajuć paŭtorna. Asudžany da pasialeńniaŭ u Novasibirskaj vobłaści. Reabilitavany ŭ 1955. Pa viartańni ŭ Minsk pracavaŭ u časopisach «Viasiołka» i «Biarozka».
Pamior u śniežni 2002 hoda.
Ściužy
Ad ściužy serca chaładzieła
I pramiarzała navylot,
Šurpacieła, jak tarka, cieła,
Nie rastavaŭ na viejkach lod.
Nie sunimałasia zavieja,
Źbivała i valiła z noh,
Zdavałasia — duša sivieje,
A praviednych karaje Boh.
Za pasłušenstva i biazvolle,
Za niepavahu da siabie,
Za abyjakavaść da bolu,
Da hruhana, što łob dziaŭbie.
A ściužy? Ściužy lutavali,
Ślapili vočy ledziašy,
I časam rebry prystavali
Da pasiviełaje dušy.
Ja tak nastryh u maładości
I navučyŭsia tak ciarpieć,
Što tolki spadziajusia kości
U krematoryi pahreć.
Bolš vieršaŭ na sajcie, pryśviečanym paetu.
U siamji Mironcavych za palityku ŭžo asudzili maci i troch siaścior. A ciapier aryštavali i muža adnoj ź siaścior3
Kamientary