Prezentacyja knihi «Imiony Svabody» ŭ Miensku i internecie — 21 vieraśnia. Adras u Miensku — Varvašeni, 8, pačatak u 18:00. Adras u internecie — sajt svaboda.org.
“Imiony Svabody” — dvanaccataje vydańnie ŭ seryi “Biblijateka Svabody. XXI stahodździe”. U knihu ŭvajšoŭ 261 histaryčny partret hierojaŭ biełaruskaj svabody 18–21 stahodździaŭ. Ad 1 studzienia 2006 hodu da Dnia Voli 2007 hodu ŭ ranišnim efiry “Svabody” Ŭładzimier Arłoŭ raskazvaŭ pra biełaruskich patryjotaŭ, zmaharoŭ za volu j niezaležnaść. Vydańnie skłali vybranyja ese z bolš čym trochsot radyjopieradačaŭ.
«Imiony Svabody» — histaryčnyja partrety paŭstancaŭ XVIII stahodździa i palitźniavolenych XXI-ha, znakamitych na ŭvieś śviet asobaŭ i ludziej, jakich viedali tolki ich siabry, jakich abjadnovała luboŭ da voli j da radzimy, i jakich aŭtar, Uładzimier Arłoŭ, uklučyŭ u panteon biełaruskaj svabody i niezaležnaści. Kniha moža słužyć dapamožnikam dla napisańnia ramanaŭ, zdymańnia filmaŭ, abarony dysertacyjaŭ, źmieny nazvaŭ płoščaŭ dy inšaha”,– havorycca ŭ anatacyi da “Imionaŭ Svabody”.
Alaksandar Łukašuk adznačaje, što hetaja kniha ŭnikalnaja tym, što jana maje pačatak, ale nia maje kanca.
“Pa svajoj idei, pa svajoj formule hetaja zadača nikoli nia skončycca, pakul budzie žyć Biełaruś. A ŭ praktyčnym planie heta aznačaje nastupnaje. Pa-pieršaje, u knihu ŭvajšli nia ŭsie pieradačy, jakija vyjšli ŭ efir i hučali na chvalach Radyjo Svaboda. Heta tłumačycca prosta abmiežavanym abjomam knihi.
Pa-druhoje, užo paśla taho, jak pieradača skončyłasia, śpis mahčymych hierojaŭ knihi papoŭniŭsia. I dziela hetaha ŭ nas była stvoranaja novaja prahrama “Vianok pamiaci”. U hetaj pieradačy my prosim raskazać pra tych ludziej, jakija pajšli ŭžo z hetaha žyćcia, ale jakija byli važnyja dla vas i dla Biełarusi”.
Za apošni hod, adznačaje Alaksandar Łukašuk, ŭ pieradačy “Vianok pamiaci” prahučała šmat imionaŭ, jakija taksama vartyja być uklučanymi ŭ hetuju knihu.
“Takim čynam, sama heta ideja, heta pieradača nia maje kanca, i my spadziajemsia, što, kali siońnia heta kniha źjavicca ŭ internecie, jana značna pašyryć svaju prysutnaść u infarmacyjnaj prastory i takim čynam jašče pryciahnie novyja idei, novyja imiony, novyja postaci”,– ličyć dyrektar biełaruskaj słužby Radyjo Svaboda Alaksandar Łukašuk.
“Alaksandar Łukašuk u svajoj pradmovie nazyvaje zbornik encyklapedyjaj lubovi, lubovi da Radzimy. Ja b jašče dadaŭ, što heta svojeasablivaja encyklapedyja nacyjanalnaha duchu, svojeasablivy rekvijem nakštałt viadomaha “Dnia hnievu”, dzie žałobnyja matyvy pieramiažoŭvajucca z uźniosłym, žyćcieśćviardžalnym aptymizmam, ź vieraj, nadziejaj i luboŭju”, kaža Anatol Viarcinski.
Ciapier čytajuć
17‑hadovy chłopiec žyvie ŭ padvale. Jon zaharnuŭsia ŭ čyrvona-zialony ściah, kab Łukašenka źviarnuŭ na jaho ŭvahu5
Kamientary