Namieśnik premjer-ministra Biełarusi Anatol Tozik 19—25 kastryčnika znachodzicca z rabočy vizitam u Kitajskaj Narodnaj Respublicy, paviedamiła pres-słužba biełaruskaha ŭrada.
21 kastryčnika Tozik sumiesna z namieśnikam ministra kamiercyi KNR Čžun Šaniem praviali ŭ Piekinie 14-je pasiadžeńnie biełaruska-kitajskaj kamisii pa handlova-ekanamičnym supracoŭnictvie. Jak adznačyła pres-słužba, «udzielniki pasiadžeńnia abmierkavali šyroki śpiektr pytańniaŭ dvuchbakovaha supracoŭnictva ŭ śfiery handlu i inviestycyj, chod vykanańnia damoŭlenaściaŭ, dasiahnutych padčas vizitu dziaržaŭnaj delehacyi Biełarusi ŭ KNR 15—17 lipienia 2013 hoda, a taksama prajekt prahramy («Darožnaj karty») raźvićcia adnosin usiebakovaha stratehičnaha partniorstva Biełarusi i Kitajskaj Narodnaj Respubliki na 2014—2020 hady».
U hety ž dzień adbyłosia 2-je pasiadžeńnie mižuradavaha kaardynacyjnaha savieta Kitajska-biełaruskaha parku, na jakim byli abmierkavany prablemy i pierśpiektyvy budaŭnictva parku. Pa vynikach pasiadžeńniaŭ baki padpisali adpaviednyja dakumienty.
22 kastryčnika Anatol Tozik praviadzie šerah sustreč z kiraŭnictvam ministerstvaŭ KNR, staršynioj narodnaha ŭrada Charbina Sun Sibinie, kiraŭnictvam Handlova-pramysłovaha banka Kitaja i šerahu najbujniejšych kampanij, jakija realizujuć prajekty ŭ Biełarusi (CAMCE; CITIC Construction Co., Ltd; Xuan Yuan).
23—24 kastryčnika vice-premjer voźmie ŭdzieł u adkryćci biełaruskaha paviljona na 14- mižnarodnym kirmašy Zachodniaha Kitaja ŭ Čendu, a taksama vystupić na 6-m mižnarodnym forumie Zachodniaha Kitaja. U hety ž čas zapłanavany sustrečy Tozika ź vice-premjeram Dziaržsavieta KNR Van Janam, kiraŭnictvam pravincyi Syčuań, a taksama naviedvańnie novaha zavoda pa vytvorčaści aŭtamabilaŭ marki «Volva», karparacyi «Džyli» i centra navukovych raspracovak kampanii Huawei.
Čakajecca, što padčas vizitu Tozika ŭ Piekin i Čendu buduć vyznačany novyja sumiesnyja inviestycyjnyja prajekty, pierśpiektyŭnyja kirunki pašyreńnia supracoŭnictva Biełarusi i Kitaja, zaklučany adpaviednyja dahavory i pahadnieńni.
Ciapier čytajuć
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza25
Kamientary