Pad Ivacevičami ŭstalavali kryžy z nadpisami «Śviataja Ruś», «Viera, caŕ i otiečiestvo», «Prosti nas, hosudaŕ»
U rajvykankamie paviedamili, što bližejšym časam kryžy prybiaruć.
Vysokija, bolš jak trochmetrovyja kryžy z nadpisami ŭ honar rasiejskaj carskaj dynastyi Ramanavych źjavilisia ŭ vioscy Białavičy Ivacevickaha rajonu, paviedamlaje radyjo «Svaboda».
Miascovyja ŭłady kažuć, što nia majuć da hetaha dačynieńnia i što ich samavolna ŭstalavaŭ vychadziec ź Białavič.
Adzin z draŭlanych kryžoŭ ustalavany ŭ vioscy Białavičy, a druhi — u lesie pobač. Adrazu ž uvahu minakoŭ pryciahvajuć vypalenyja na kryžach nadpisy — «Śviataja Ruś», «Viera, caŕ i otiečiestvo», «1613–2013», «Prosti nas, hosudaŕ».
Mienavita z 1613 hodu ŭ Rasiei panavała carskaja dynastyja Ramanavych, tamu białavickija ludzi kažuć, što kryžy ŭstalavanyja ŭ honar rasiejskich caroŭ.
Jak raspavioŭ tutejšy žychar, kryžy pastaviŭ vychadziec ź Białavič, adept pravasłaŭja, jaki časam pryjaždžaje siudy ŭ carkvu: «Adept pravasłaŭja… Ja ź im i havaryć ciapier nie chaču… Čarnasocieniec niejki, z medalom niejkim chodzić, jon źviazany ź niejkimi tymi… to pra kazakoŭ niešta mnie tut ploŭ… 1965 hodu, niedzie žyvie ŭ Biełaaziorsku ci Piaskach. Siamja jość, dzieci jość.
Ja bačyŭ jaho hetaje ščyraje — z baradoju chodzić, pakłony bje, ale ž nia dumaŭ, što ŭ takoj stupieni… Pastaŭlenaja Chrystom carkva, ale ž nie ŭ takoj stupieni, što pchać siudy palityku. Na kryž palityku zapchnuŭ… Čarnasocienski lozunh…»
U Ivacevickim rajvykankamie Svabodzie paviedamili, što kryžy ŭstalavanyja biez dazvołu ŭładaŭ i što ciapier z hetym raźbirajucca:
«Tam hetyja kryžy niejki ź Biełaaziorsku mužyk pastaviŭ. Samavolna. Staršyni sielskaha savietu dadzienaja kamanda ŭ miesiačny termin razabracca, jaho pryciahnuć da taho, kab jon ich paznosiŭ. Nichto nia suprać hetych prydarožnych kryžoŭ, ale jany niejkija tam niezrazumiełyja… Tam bolš čarnasociennaje niešta…»
U rajvykankamie paviedamili, što bližejšym časam kryžy prybiaruć. Vioska Białavičy siońniašniaha Ivacevickaha rajonu viadomaja ź pieršaj pałovy XV stahodździa.
U 1630 hodzie tut pabudavali ŭnijackuju Illinskuju carkvu. Ciapier carkva pravasłaŭnaja, maje status historyka-kulturnaj kaštoŭnaści.
Na pačatku panavańnia ŭ Rasiei Ramanavych Białavičy byli ŭ składzie Vialikaha kniastva Litoŭskaha i Rečy Paspalitaj, dziaržavy, jakaja varahavała z Rasiejaj. U skład Rasiejskaj imperyi Białavičy trapili ŭ vyniku treciaha padziełu Rečy Paspalitaj u 1795 hodzie.
Kamientary