Milicyja admoviła Vasilu Parfiankovu ŭ pieravodzie ŭ Dziaržynski ŁPP
Pra heta stała viadoma paśla taho, jak hrupa hramadzkich aktyvistaŭ naviedała byłoha palitviaźnia Vasila Parfiankova ŭ lačebna-pracoŭnym prafilaktoryi Śvietłahorsku 21 listapada, paviedamlaje radyjo «Svaboda».
«Čamu Vasilu nie dazvolili pieravieścisia ź Śvietłahorsku ŭ Dziaržynsk, u dakumencie z Departamentu vykanańnia pakarańniaŭ MUS, jaki jon atrymaŭ, ničoha nie paviedamlajecca», — apaviała karespandentu «Svabody» kinarežyser Volha Mikałajčyk. Pavodle Volhi Mikałajčyk, z prośbaj pieravieści syna ŭ Dziaržynsk, bližej da Miensku, źviartaŭsia ŭ milicyju taksama baćka palitviaźnia Piotar Parfiankoŭ, ale adkazu dahetul nie atrymaŭ. «Chutčej za ŭsio, taksama budzie admova», — miarkuje Volha Mikałajčyk.
Pavodle jaje źviestak, Vasil Parfiankoŭ žadaŭ pieravodu bližej da Miensku, kab svajakam i siabram było lahčej naviedvać jaho. Adnoj z pryčynaŭ jość i toje, što dziaŭčyna, ź jakoj siabruje Vasil Parfiankoŭ, zaciažaryła. Jany mierkavali stvaryć siamju, i znachodžańnie Vasila Parfiankova ŭ Dziaržynsku było b dla ich zručniej.
Što novaha pra ŭmovy ŭ Śvietłahorskim ŁPP stała viadoma paśla naviedvańnia hetaj ustanovy aktyvistami?
«Na sustreču Vasil Parfiankoŭ pryjšoŭ z pracy, ruki źbityja. Akazvajecca, da ich pastupiła vialikaja zamova z Rasiei na vyrab admysłovych katušak dla elektrakabelu, dyk zaraz jaje vykonvajuć. A Vasil źbivaje doški dla hetych katušak, tamu ruki časta ranić. Ale ničoha, zadavoleny. Imi skazali, što mohuć na hetym niadrenna zarabić. A da taho byli zarobki mizernyja. Prykładam, za minuły miesiac Vasilu zaličyli 18 pracoŭnych dzion, za jakija naličyli 160 tysiač rubloŭ, a atrymaŭ ź ich jon 40 tysiač, dy i toje — nie najaŭnymi, a na kartku, praź jakuju ŭ atavarcy možna niešta nabyć. Charčavańnie tam vielmi biednaje, pra harodninu i sadavinu havorki niama», — raspaviała sa słovaŭ Parfiankova Volha Mikałajčyk.
Pavodle źviestak ad Vasila Parfiankova, Śvietłahorski ŁPP mieścicca ŭ byłoj žanočaj kalonii, paradki tam — «sumieś asobaha, ahulnaha i armiejskaha režymaŭ». U nievialikim pakoi, dzie žyvie Vasil Parfiankoŭ, znachodzicca ažno 40 čałaviek, śpiać na łožkach u dva jarusy. «Vialikaja ciskanina», — kaža Vasil Parfiankoŭ. Asabliva były palitviazień pakutuje praź niedachop abjektyŭnaj infarmacyi: bolšaść niezaležnych hazetaŭ, na jakija jaho padpisali, jon hetak i nie atrymlivaje. Poštaj da jaho dachodzić tolki hazeta «Svobodnyje novosti plus». Mabilnym telefonam, jaki aktyvisty nabyli Vasilu Parfiankovu, karystacca jamu faktyčna nie dajuć. «Hetak tolki z Vasilom; inšym možna zvanić, kali pryjdzie sms-ka ad svajakoŭ ci siabroŭ», — zaŭvažaje Volha Mikałajčyk.
Aktyvistka była vielmi ździŭlenaja tym, što Vasil Parfiankoŭ navat nia viedaŭ pra toje, što 28 listapada nad im budzie sud u Miensku: pavodle parušeńnia praviłaŭ prafilaktyčnaha nahladu. «Nie vyklučana, što Vasilu daduć niejki inšy termin, i jahonaje stanovišča źmienicca, ale ŭ horšy bok», — miarkuje Volha Mikałajčyk. Pry hetym jana adznačaje, što Vasil Piarfiankoŭ u dobrym nastroi, dziakavaŭ ludziam za padtrymku i salidarnaść ź im.
Pavodle źviestak ad Vasila Parfiankova, zaraz u ŁPP, dzie jon znachodzicca, nijakich lekaŭ ad alkahalizmu jon uvohule nie atrymlivaje, navat «ramonkavy nastoj», jaki vydavali ŭ čas karantynu, davać pierastali. «Pracaterapija — hałoŭny lačebny metad u biełaruskim ŁPP», — adznačaje Volha Mikałajčyk.
Kamientary