Rost zarpłat rabotnikaŭ biudžetnaj śfiery ŭ 2014 adbudziecca za košt aptymizacyi kolkaści biudžetnych arhanizacyj, havorycca ŭ tłumačalnaj zapiscy Ministerstva finansaŭ da prajekta biudžetu na nastupny hod.
«Raschody na zarabotnuju płatu ŭ biudžetnym siektary dazvalajuć zachavać jaje pamier u realnym vyražeńni. Pry hetym rost zarabotnaj płaty budzie zabiaśpiečvacca za košt aptymizacyi struktury i kolkaści biudžetnych arhanizacyj», — adznačaje Minfin.
Akramia taho, respublikanskim i miascovym orhanam dziaržkiravańnia dadziena prava pavialičvać taryfnuju staŭku dla raźliku zarabotnaj płaty pa biudžetnych arhanizacyjach «u miežach srodkaŭ pa kaštarysie raschodaŭ, za vyklučeńniem raschodaŭ na apłatu kamunalnych pasłuh i kapitalnych raschodaŭ».
U biudžetnych arhanizacyjach naminalnaja naličanaja siaredniamiesiačnaja zarabotnaja płata ŭ studzieni—vieraśni 2013 hoda skłała 3 młn. 675,5 tys. rubloŭ, u tym liku ŭ vieraśni — 3 młn. 950,3 tys.
Realnaja (z ulikam inflacyi) zarabotnaja płata biudžetnikaŭ u studzieni—vieraśni 2013 hoda ŭ paraŭnańni z anałahičnym pieryjadam 2012 hoda pavialičyłasia na 7,5%.
Pavodle acenak Ministerstva ekanomiki siaredniamiesiačnaja zarabotnaja płata ŭ biudžetnaj śfiery składzie ŭ 2013 hodzie 426,4 dołara i vyraście da 455 dołaraŭ u nastupnym hodzie. U pramysłovaści siaredniamiesiačnaja zarpłata sioleta, pavodle acenak Minekanomiki, składzie 654,6 dołara i vyraście ŭ 2014 hodzie da 705 dołaraŭ.
U 2013 hodzie rost zarpłat u pramysłovaści značna apiaredžvaŭ rost zarpłat u biudžetnym siektary. Pavodle acenki Minekanomiki, u pramysłovaści realnaja zarpłata vyraście na 21,2%, u biudžetnaj śfiery — na 7,6%.
Kamientary