Rasija daje Biełarusi ŭ 2014-m nafty pa maksimumie: nas čakaje hod ekanamičnaha rostu
Ale ŭzamien za naftu Rasija choča ŭvajści ŭ piać biełaruskich prybytkovych pradpryjemstvaŭ.
Maskva i Minsk damovilisia pra pastaŭku nafty ŭ Biełaruś u abjomie 11,5 młn ton u pieršym paŭhodździ 2014 hoda, paviedamlajecca na sajcie ŭrada Rasii.
Heta roŭna stolki, kolki prasiŭ biełaruski bok. Kali abjomy pastaŭki zachavajucca ŭ druhim paŭhodździ, to ahulnaja hadavaja kolkaść składzie 23 młn ton.
Sioleta Biełaruś atrymaje tolki kala 20,5 młn tonaŭ nafty. Heta vyklikała rezkaje skaračeńnie abjomaŭ ekspartu z našaj krainy.
Naftapradukty zastajucca asnoŭnaj krynicaj valuty dla Biełarusi, tamu pastaŭka nafty pa poŭnaj aznačaje, što nastupny hod stanie hodam ekanamičnaha rostu. Kali, viadoma, suśvietnyja ceny na naftu nie ŭpaduć.
Namieśnik staršyni ŭrada Rasii Arkadź Dvarkovič i pieršy namieśnik premjer-ministra Biełarusi Uładzimir Siamaška na sustrečy ŭ piatnicu damovilisia, što baki da kanca 2013 hatovyja taksama padpisać indykatyŭnyja bałansy pa pastaŭkach vuhalu, elektraenierhii i hazu.
U 2013 u vyniku supiarenačnaściaŭ damovy na pastaŭki nafty byli kvartalnymi. Minsk spadziavaŭsia padpisać bałans na 2014. Jak stała viadoma z krynic va ŭradzie Rasii, Maskva abumoŭlivała padpisańnie zruchami ŭ pryvatyzacyi šerahu biełaruskich pradpryjemstvaŭ. Padpisańnie ŭradam prajektaŭ akcyjanavańnia piaci pradpryjemstvaŭ, u tym liku Minskaha zavoda kołavych ciahačoŭ, było zroblena, kab dabicca naftavaha bałansu.
«U pryvatnaści, havorka [na sustrečy Dvarkoviča i Siamaški] išła ab prajektach z rasijskimi kampanijami AAT «MZKC», AAT «Intehrał», AAT «Pielenh», AAT «Hrodna Azot», a taksama ab chodzie realizacyi prajekta AAT «KamAZ» i AAT «MAZ», — zaŭvažana ŭ tym samym paviedamleńni ŭrada, u jakim infarmujecca pra abjom pastavak nafty.
Kamientary