15 studzienia spaŭniajecca 20 hadoŭ, jak va ŭročyščy Kurapaty na miescy hibieli achviaraŭ stalinskich represij prezydent ZŠA Bił Klintan adkryŭ memaryjalny znak, jaki ciapier nazyvajuć nie inakš jak Łava Klintana.
Heta byŭ adziny ŭ historyi niezaležnaj Biełarusi vizyt prezydenta ZŠA, i symbalična, što amerykanski lider pakinuŭ pa siabie mienavita taki znak «Ad narodu Złučanych Štataŭ Ameryki narodu Biełarusi dziela pamiaci».
Mała znojdziecca ŭ Biełarusi takich šmatpakutnych memaryjalnych znakaŭ jak Łava Klintana.
Tolki na majoj pamiaci jaje bolš za 12 razoŭ apahańvali vandały. I ich nikoli nie znachodzili.
Mnie šmat razoŭ davodziłasia terminova jechać u Kurapaty z fotaaparatam i dyktafonam, bo patelefanavali: «Iznoŭ apahanili Łavu Klintana». I tak ciažka i soramna było hladzieć na raźbity znak, jak ŭvasableńnie ździeku ź sotniaŭ tysiač kurapackich achviaraŭ, jak abrazu ZŠA, čyje lidery pamiatajuć pra trahiedyju biełaruskaha narodu, tady jak
biełaruski kiraŭnik nikoli za dvaccać hadoŭ prezydenctva nie naviedaŭ Kurapaty.
Ja dobra pamiataju, jak nieadnarazova braŭsia za adnaŭleńnie znaku skulptar Aleś Šaternik, jak zalivaŭ beton u asnovu łavy aktyvist KCHP BNF Aleś Čacholski i mnohija inšyja. Pamiataju ŭračystaje maŭčańnie ambasadara ZŠA Majkła Kozaka padčas cyrymonii adkryćcia adnoŭlenaha znaku ŭ 2002 hodzie ŭ Kurapatach. Tady padavałasia, što Łavie Klintana bolš ničoha nie pahražaje, ale vandalizm nie spyniaŭsia.
Pamiataju, ź jakoj pavahaj i sumam dziasiatki razoŭ ŭskładali kvietki da łavy ambasadary ZŠA i krainaŭ Eŭraźviazu, jak sotni razoŭ pobač ź joj zapalvali śviečki ludzi, jakija prychodzili ŭ Kurapaty ŭšanavać pamiać achviaraŭ stalinskich represij,
i jak štohod žančyny z KCHP BNF sadzili biełyja i čyrvonyja kvietki la łavy…
Łavu Klintana raźbivali, razmaloŭvali farbaj, vykradali jaje kavałki, ale jana praciahvaje stajać,
kožny raz adnoŭlenaja i nieparušnaja, jak pamiać pra achviaraŭ i jak znak pavahi ad narodu ZŠA.
Nia viedaju, chto pryjdzie 15 studzienia ŭ Kurapaty ŭskłaści kvietki i zapalić śviečku la Łavy Klintana, ale pierakananaja, što ludzi tam abaviazkova buduć. I ja pierakananaja, što mahčyma i nia tak chutka, ale Kurapaty abaviazkova naviedaje prezydent. I nia tolki amerykanski.
Kamientary