«Sovietskaja Biełoruśsija» apublikavała źniščalnuju pieradavicu pra chakiejnaje «Dynama»: Heta panyły łoś ź vialikaha baduna. Navošta takoje «Dynama»?

Prezidenckaja hazieta apublikavała siońnia pieradavicu, pryśviečanuju chakiejnamu kłubu «Dynama» Minsk. Aŭtar — viadomy žurnalist Siarhiej Kanašyc

U sioletnim siezonie Kantynientalnaj chakiejnaj lihi «Dynama», jakoje zrabiła staŭku na biełaruskich hulcoŭ, vystupaje krajnie niaŭdała. Paśla 43 hulniaŭ kłub tryvała asieŭ na apošnim miescy ŭ Zachodniaj kanfierencyi z 42 ačkami. Adstavańnie ad pieraapošniaha miesca składaje vosiem ačkoŭ, a ad zony płej-of — 24. Apošnim matč «Dynama» prajhrała ŭ Chanty-Mansijsku ź likam 0:6, heta samaja bujnaja paraza biełaruskaha kłuba ŭ KCHŁ.

« … U čarhovym matčy vyjaznoha turne chakieisty minskaha «Dynama» sastupili ŭ Chanty-Mansijsku «Juhry». Nie prosta prajhrali, a vystavili pierad supiernikami abiedźvie ščaki i skazali: «Bi!»

Tak i chvastali ich try pieryjady, — iranizuje hazieta. — Paraza 0:6 — samaja bujnaja ŭ hetym siezonie. Bo da hetaha momantu zdavałasia, što byli dla dynamaŭcaŭ časy i horaj. (…) Tak, prajhravali. Ale ž bilisia. Vajavali. Abyjakavych nie było ni ŭ kiraŭnictvie, ni na placoŭcy, sprabavali raści, vypraŭlać situacyju.

A siońnia paśla parazaŭ zamiest złoha aščeru na dynamaŭskim tvary atrymlivajecca ŭbačyć tolki chłopańnie viejkami i razhublenaje maŭčańnie. Miła dla fihurnaha katańnia, a dla chakieja niejak nie kamilfo».

«Z 43 praviedzienych matčaŭ čempijanatu KCHŁ minskaje «Dynama» ŭ hetym siezonie ŭ asnoŭny čas zdabyła tolki 11 pieramoh. Statystyka žachlivaja da zvonu ŭ vušach. Jakaja bje abuchom pa hałavie. Skažy chto-niebudź pra heta družnym zaŭziataram «Dynama» hod tamu — i takoha prazorcu prosta pabili b. Bo heta ŭjaŭlałasia niejmaviernym! Ale voś — jość.

Što ni robiać — usio niedarečy. Trenieraŭ na pierapravie pamianiali. Skład pierakrojvajuć, mianiajučy levy čaravik z pravym, a pravy — ź levym. Dziŭna, ale nie dapamahaje!

Nie adhadali ź nivodnym lehijanieram, tak i nie zapoŭniŭšy adviedzienuju kvotu. Tasujuć hulcoŭ, to adpraŭlajučy ich u farm- kłub, to viartajučy nazad, a sonca z-za chmar nie prahladvaje, vynik nie palapšajecca, a naadvarot. Jak u aniekdocie. Ranica. Tuman. Ručaj na ŭskrajku lesu. Z pola da lesu padychodzić palaŭničy. Ź lesu da ručaja — łoś ź vialikaha baduna. Łoś pačynaje pić. Palaŭničy padychodzić da jaho na adlehłaść dva mietry i pačynaje celicca. Łoś pje. Palaŭničy stralaje. Łoś praciahvaje pić. Palaŭničy znoŭ stralaje.

Łoś praciahvaje pić i panyła marmyča: «Voś pju ja, pju, a mnie ŭsio horš i horš…»

0:6 ad «Juhry» — heta, viadoma, pierabor. Moža, kahości pakarać ŭžo čas, aštrafavać, pavysić hołas, špurnuć hrafinam u ścianu ci skazać u raspranalni mocnaje słoŭca?

A to składajecca ŭražańnie, što ŭsio i ŭsich zadavalniaje, što kamanda prosta skančvaje siezon, biez usialakich kankretnych metaŭ i imknieńniaŭ.

Abo tak i budziem šeptam kazać, što tak, prablema jość, my jaje bačym. Ale treba ž nie tolki bačyć, a vyrašać. Choć by pasprabavać. Zrabić choć niešta, akramia taho, što jašče raz adpravić bramnika Milčakova ŭ Žłobin, a na nastupny dzień viarnuć jaho nazad.

Dy jon bolš u darozie času pravodzić, čym na treniroŭkach, kažučy fihuralna.

Heta ŭžo ź inšaha aniekdota situacyja. «Bratka, dapamažy, mašyna nie zavodzicca!» — «A ty pa kołach stukaŭ?» — «Tak». — «A rul kruciŭ? « — «Tak, i farami mirhaŭ». — «Tady prabač, nie viedaju navat, jak tabie dapamahčy…»

Što takoje «Juhra»? «Juhra» — heta 11-ja kamanda Uschodniaj kanfierencyi, jakaja taksama nie traplaje ŭ płej-of. I ŭ jakoj 12 pieramoh u asnoŭny čas u hetym siezonie. Chakieisty tam nie macniejšyja, čym u «Dynama», umovy nie lepšyja.

Dyk adkul hetyja pakorlivyja 0:6? Heta ž pravał! Heta hańba. I ŭsio roŭna maŭčok. Heta maŭčańnie zabivaje bolš za ŭsio.

Nichto ž navat nie padumaŭ pierad zaŭziatarami paprasić prabačeńnia, voś u čym sprava. Jak byccam ničoha nie adbyłosia, niby tak i treba, nakštałt zvyčajnaja i zvykłaja situacyja. Abo sapraŭdy ŭžo pryvykli? Tady inšaje pytańnie: navošta takaja zvyčka chakieistam zbornaj Biełarusi pierad chatnim čempijanatam śvietu? Bo byccam by jak pierad pačatkam siezonu kazali, što «Dynama» budzie bazavym kłubam nacyjanalnaj kamandy. Što ž heta baza — biez vyniku i charaktaru.

Hetak Hlenu Chenłanu pryjdziecca vystupać nie ŭ roli treniera zbornaj, a ŭ vobrazie reanimatara — ekstrana i ŭ karotki čas viartać chakieistaŭ da žyćcia. Abo nie vyklikać ich u zbornuju, što jon užo praktykuje, admaŭlajučysia ad niekatorych kandydataŭ. Ale navošta tady naohuł nam takoje « Dynama»?

Pytańniaŭ šmat, adkazaŭ — nie. Pytańni vyjhrajuć u hetym matčy u adkazaŭ, jak «Juhra» ŭ «Dynama» — biez varyjantaŭ, usuchuju. Voś jašče adno pytańnie: ci razzłavalisia dynamaŭcy na siabie paśla sakrušalnaha kanfuzu ŭ Chanty-Mansijsku?

Nie razvučylisia jašče złavacca naahuł? Daviedajemsia siońnia. Pačatak matču suprać «Aŭtamabilista» ŭ Jekaciarynburhu ŭ 16.00.

• 0
• 0
• 0
• 0
• 0
• 0
• 0
• 0