Viazień z Akreścina: Kali my ŭsie pachvareli, to zbuntavalisia

Demakratyčny aktyvist Pavał Kurjanovič na dniach vyjšaŭ na svabodu ź śpiecpryjomnika-raźmierkavalnika na Akreścina. Za raspaŭsiudžvańnie infarmacyjnych materyjałaŭ da Jeŭrapiejskaha Marša apazicyjanier byŭ prysudžany da 10 sutak aryštu.

Paŭła Kurjanoviča zatrymali 10 kastryčnika, a 23 hadzinie ŭ mikrarajonie Kuncaŭščyna za raspaŭsiudžvańnie nalepak da Jeŭrapiejskaha Marša. Noč jon pravioŭ u Frunzienskim RUUS, a na nastupny dzień sud taho ž rajona prysudziŭ aktyvista da 10 sutak aryštu.

Demakratyčnaha aktyvista abvinavacili ŭ parušeńni art. 23.34 – «parušeńnie praviłaŭ arhanizacyi i praviadzieńnia masavych mierapryjemstvaŭ». Śviedkami na pracesie byli supracoŭniki Frunzienskaha RUUS Maroz V.V., Hałuza A.V. i Hamza D.A.

U śpiecpryjomnik-raźmierkavalnik 18-hadovy Pavał Kurjanovič patrapiŭ u pieršy raz. «Ludzi, ź jakim daviałosia siadzieć, u asnoŭnym byli bytavymi chulihanami. Ale mnie pašancavała, ja adrazu patrapiŭ u adnu kamieru z moładzievym aktyvistam Alaksandram Atroščankavym, potym da nas padsadzili Paŭła Juchnieviča. Kali b nie jany, było b značna ciažej. Chłopcy mianie vydatna padtrymali», – raspavioŭ Kurjanovič u intervju pres-centru Chartyi'97.

Pa słovach demakratyčnaha aktyvista, samym ciažkim u śpiecpryjomniku była adsutnaść prahułak na śviežym pavietry. «Špacyravać nikoha nie vyvodzili. Kazali, što ŭ ich niama dzie – nibyta śpiecyjalny panadvorak tolki prajektujecca. Na hramadskija pracy apazicyjanieraŭ demanstratyŭna nie brali. Achoŭnik prychodziŭ klikać na pracu tolki «niepalityčnych», – adznačaje Pavał.

Supracoŭniki śpiecpryjomnika pavodzili siabie pa dačynieńni da aryštantaŭ davoli prystojna. Ale nie ŭsie. «Byŭ adzin milicyjant, jaki, kali zastupiŭ na načnoje dziažurstva, usiu noč chadziŭ pa kalidory, i kali čuŭ dzieści kašal, adrazu adčyniaŭ «akienca» kamiery i kryčaŭ: «Usie spać! Adboj!», – havoryć aktyvist.

Ale nie kašlać, pavodle jaho słoŭ, było niemahčyma. U kamierach było vielmi choładna. Asabliva pakutavali «niepalityčnyja» – šmat kamu ź ich nie pieradali ciopłyja rečy. Ludzi surjozna prastyvali.

Adnojčy, kali ŭsie pierachvareli, aryštanty zbuntavalisia i zapatrabavali prynosić im haračuju harbatu, zamiest ledź ciopłaj. «Čahości my damahlisia – harbata stała sapraŭdy ciaplejšaj, a časam u joj navat było zusim trochi cukru», – kaža Kurjanovič.

Pavodle pratakołu zatrymańnia, Paŭła Kurjanoviča pavinny byli vyzvalić u noč z suboty na niadzielu. Roŭna ŭ 00.10 – mienavita hety čas značycca jak čas zatrymańnia. Adnak, pa nieviadomaj pryčynie, aktyvista vyzvalili tolki ŭ 12 hadzin nastupnaha dnia. To bok, Kurjanoviču daviałosia prasiedzieć za kratami lišnija paŭdnia.

• 0
• 0
• 0
• 0
• 0
• 0