Apazycyi padkinuli "trajana"?
Były elektarat Łukašenki, pierastajučy vieryć u "dziaržavu dla narodu", nia nadta, adnak, kidajecca hrymieć pustymi kastrulami. Piša ŭ svaim błohu Alaksandar Kłaskoŭski.
"Sacyjalny marš" čakana pasłali na Banhalor. Hienerał Frałoŭ, adzin z zajaŭnikaŭ, pachvaliŭ meryju, što choć zahadzia paviedamiła. Chacia heta moža być chod trajanskim kaniom.
Zhadajma: i na Dzień Voli, i padčas "Eŭrapiejskaha maršu", matyvujučy ŭpartaje imknieńnie trapić na Kastryčnicki plac, apazycyjnyja lidery trymalisia taje lehiendy, što mnohija udzielniki nia viedajuć pra źmienu maršrutu. Ciapier lehienda moža nie prajści, i tady arhanizataram mała nia zdasca.
Zrešty, nia vyklučana, što siarod zajaŭnikaŭ pieramoža nastroj na toje, kab "nie abvastrać". Va ŭsiakim razie, hienerał Frałoŭ, zdajecca, trymajecca praviła, što dobryja vajaki zaŭždy iduć u abychod:)
Kali b heta sapraŭdy byŭ marš pustych kastrulaŭ, jak patetyčna zajaŭlajuć asobnyja pravadyry, to maršrut, peŭna, nia mieŭ by dla mierkavanaha kantynhientu ("apalityčnych abyvatalaŭ") takoha pryncypovaha značeńnia, jak dla "eŭrapiejcaŭ" ("Plac Kalinoŭskaha — heta śviatoje!"). Adnak jość vialiki sumnieŭ, što na akcyju masava vyjduć tyja, kaho nasamreč kapitalna sadžaje na miel nieabchodnaść kuplać małako na sto rubloŭ daražej.
Bolej imavierna, što kaściak manifestantaŭ składuć nie razhnievanyja pensijanery ź liku rasčaravanaha "ćviordaha elektaratu", a zvykłyja typažy. To bok — partyjnyja aktyvisty (chiba što z bolšaj dolaju levych), palityčna niaŭrymślivaja intelihiencyja, žurnalisty, "ludzi ŭ cyvilnym"... Moładzi moža być i mieniej, bo studentaŭ, u jakich adbirajuć ilhoty, adukacyjnaja vertykal dy "orhany" trymajuć u vožykavych rukavicach.
Sacyjalohija śviedčyć: pry tym što padaje dola prychilnikaŭ ułady i rejtynh kiraŭnika dziaržavy, štykoŭ u tytulnaj apazycyi nia bolšaje (dyj i bieź NISEPD bačna!). Były elektarat Łukašenki, pierastajučy vieryć u "dziaržavu dla narodu", papaŭniaje pasyŭnaje hramadzkaje bałota. Jon cicha burčyć na kuchni ci, u skrajnim vypadku, napaŭhołasu mitynhuje la ceńnikaŭ u kramie.
Čamu tak — asobnaja tema dla razvahaŭ.
Tym časam palitolah Valer Karbalevič paśla "Eŭrapiejskaha maršu" vykazaŭ mierkavańnie: musić, piać tysiačaŭ (plus-minus...) i jość pakazčykam mabilizacyjnaha patencyjału apazycyi na siońniašni dzień — niezaležna ad temy akcyi, jaje lozunhaŭ i maštabaŭ ahitacyjnaj kampanii. Dadamo: badaj, i niezaležna ad maršrutu.
Pabačym, ci zdoleje "Sacyjalny marš" abvierhnuć hetuju hipotezu.
Źniavoleny raskazaŭ, jak siadzieŭ u kałonii ŭ Hłybokim u susiedniaj kamiery sa Statkievičam3
Kamientary