Minachovy zdaroŭja suprać SAAZ: Biełaruś nie choča być samaj pituščaj nacyjaj
Ministerstva achovy zdaroŭja Biełarusi nakiravała aficyjnaje piarečańnie z nahody pieršaha miesca Biełarusi ŭ rejtynhu samych pituščych krain śvietu. Nielehalnaha ałkaholu (chatniaha vina, harełki i inšaha niesiertyfikavanaha ałkaholu) u nas pjuć mienš, čym pakazana ŭ dakładzie. Pra heta kaža hałoŭny narkołah Ministerstva achovy zdaroŭja Ivan Kanarazaŭ.
«Da našaj respubliki byŭ užyty zavyšany kaeficyjent niezarehistravanaha ałkaholu», — paviedamlaje śpiecyjalist. Na nielehalnyja śpirtnyja napoi ŭ dakładzie zakładziena 22% ad zarehistravanych — taki pracent ŭžyvajecca dla bolšaści krain Uschodniaj i Paŭdniovaj Jeŭropy, kaža narkołah.
Ale dla Biełarusi hety pracent zanadta vialiki, tamu što ŭ našaj krainie ŭviedziena administracyjnaja adkaznaść za samahonavareńnie. «Da taho ž u nas ustanoŭlenaja dziaržaŭnaja manapolija na vytvorčaść ałkaholu, tamu abjomy vypusku kantralujucca».
«My viali pierapisku sa štab-kvateraj SAAZ pa hetym pytańni dla taho, kab raźlik praviali bolš karektna. I ŭ SAAZ pahadzilisia z nami, što adzinaj zaćvierdžanaj mietodyki raźliku [spažyvańnia nielehalnaha ałkaholu] niama», — kaža hałoŭny narkołah Ministerstva achovy zdaroŭja.
Paśla aficyjnaha zvarotu ŭ dakład dadali dadzienyja ab tym, što ŭ 2011 hodzie ŭ Biełarusi zaćvierdzili nacyjanalnuju antyałkaholnuju prahramu na 2011-2015 hady. Jana praduhledžvaje žorstkija miery ŭ dačynieńni da pjanych kiroŭcaŭ, zabaronu na rekłamu ałkaholu pa TB i radyjo z 7 da 22 hadzin i štrafy dla samahonščykaŭ. Hetyja miery, adznačana ŭ dakładzie, užo dali niekatoryja chutkija vyniki: skaraciłasia ŭžyvańnie ałkaholu z 2011 pa 2012 hod na 6,5%, a z 2012 pa 2013 — na 11,4%, źniziłasia kolkaść kryminalnych złačynstvaŭ, učynienych u pjanym stanie.
Jašče Jeŭrapiejskaje biuro SAAZ raspracavała mietodyku acenki nacyjanalnych stratehij u dačynieńni da ałkaholu i praviało daśledavańnie dadzienych 50 krain Jeŭropy. Tak, pavodle papiarednich raźlikaŭ, Biełaruś uvajšła ŭ pieršuju dvaccatku dziaržaŭ Jeŭropy z hruntoŭnaj antyałkaholnaj palitykaj, adznačaje Kanarazaŭ. Vyniki daśledavańnia buduć apublikavany ŭ 2014 hodzie.
Kamientary