Andraš Rac: Biełaruś nie zmahła b adkazać na hibrydnuju vajnu navat tak, jak ukraincy

Takuju dumku vienhierski palitołah vykazaŭ na kanfierencyi «Biełaruś na avanscenie Jeŭrazii: miž Maskvoj i Kijevam», što adbyvajecca 31 maja — 1 červienia va Univiersitecie Łazarskaha ŭ Varšavie.

Heta 7-ja takaja kanfierencyja na biełaruskuju tematyku ŭ pryvatnym polskim univiersitecie, dzie navučajecca šmat biełaruskich studentaŭ-płatnikaŭ.

Jakija vysnovy možna zrabić ź Jeŭramajdanu?

«U adroźnieńnie ad kalarovych revalucyj, Jeŭramajdan nie byŭ źviazany z vybarami. Pratesty mohuć vybuchnuć u luby čas, i nieabaviazkova patrebna, kab ich arhanizoŭvali palityčnyja partyi. Pryčym Jeŭramajdan vybuchnuŭ spantanna, za im nie stajali zamiežnyja siły», — adznačaje Andraš Rac.

Na dumku Raca, našmat važniejšyja tyja zamiežnapalityčnyja vysnovy, jakija možna zrabić z ukrainskaj situacyi.

Jak akazałasia, «Rasija nie tolki hatovaja destabilizavać situacyju ŭ susiednich krainach i parušać ustanoŭlenyja miežy, ale i hanarycca takimi svaimi dziejańniami». Maskva, jak akazałasia, hatovaja ŭžyvać instrumient «hibrydnaj vajny» ŭ zamiežnaj palitycy ŭ dadatak da tradycyjnych instrumientaŭ. «I niama jasnaj stratehii, jak abaraniacca ad hibrydnaj vajny», — kaža Rac.

U toj ža čas padziei va Ukrainie pakazali, što «niekalki sotniaŭ dyviersantaŭ ci šturmavikoŭ mohuć zachapić šmat budynkaŭ i vyklikać vialiki chaos, ale nie zdolnyja ŭtrymać terytoryju daŭžejšy čas ad nastupu rehularnaj armii», — kaža Rac. Asabliva kali ŭkrainskija ŭłady mohuć abapiercisia na vialikuju častku hramadstva i na mižnarodnuju supolnaść.

Padziei ŭ Danbasie pakazali, što dla praduchileńnia hibrydnaj vajny patrebnaja mocnaja miaža, kab u krainu nie pranikała zbroja.

Ale Biełaruś nie maje miažy z Rasijaj, adznačaje Rac.

Ukrainskija padziei taksama pakazali, što «siłavyja struktury byli masava infiltravanyja rasijskimi ahientami», — adznačaje Rac.

U vyniku kiraŭnik Čarnamorskaha fłota Ukrainy zaklikaŭ marakoŭ pierajści pad ściahi Rasii. Paśla zdradnikami akazalisia vysokapastaŭlenyja aficery hruppy «Alfa», u vyniku čaho pad Słavianskam zahinuŭ kiraŭnik hetaj struktury.

Na dumku Raca, situacyja ź siłavikami ŭ Biełarusi moža być abo takaja ž kiepskaja, abo jašče horšaja.

Vienhierski palitołah robić vysnovu, što na siońnia Biełaruś zastajecca mała słaba abaronienaj ad pahrozy z uschodu.

Kali Maskva ŭ toj ci inšy momant vyrašyć likvidavać biełaruskuju dziaržaŭnaść, Biełarusi niaprosta budzie baranicca.

• 0
• 0
• 0
• 0
• 0
• 0
• 0
• 0