Maryłuize Biek: U Biełarusi jość stabilnaść, ale niezaležnaść krainy pad pahrozaj

Niezaležnaść Biełarusi znachodzicca pad pahrozaj z-za ŭsio bolšaha dałhavoha ciažaru i nieefiektyŭnaj ekanomiki. Takuju dumku vykazała ŭ ekskluziŭnym intervju BiełaPAN deputat bundestaha Maryłuize Biek, jakaja znachodzicca ź vizitam u Minsku.

Pavialičyć

Na pytańnie pra najaŭnaść dasiahnieńniaŭ za 20 hadoŭ prezidenckaha kiraŭnictva Alaksandra Łukašenki, Biek adkazała: «Vidavočna, tut jość stabilnaść. Nakolki ja baču, biełarusy hladziać na ŭkrainskuju situacyju tak: u nas, mahčyma, niama niejkich svabod, ale tam idzie vajna». 

«Adnak za hetaj ujaŭnaj pazityŭnaj pavierchniaj jość i inšy bok, — padkreśliła parłamientaryj. — I heta nie tolki palitźniavolenyja, abmiežavanyja pravy i svabody, parłamient, jaki nie pryznany Zachadam, tamu što pa našych kryteryjach jon nie byŭ vybrany na svabodnych i spraviadlivych vybarach. Tema, pra jakuju sapraŭdy treba havaryć, — heta ekanomika krainy, jakaja vyklikaje zaniepakojenaść». 

U pryvatnaści, zaznačyła Maryłuize Biek, uzrastaje patrebnaść Biełarusi ŭ novych pazykach i kredytach. «Pytańnie ŭ tym, kali i jak jany buduć viernutyja, kali naohuł buduć», — skazała jana. 

Na dumku deputata, nijakija represii «nie spyniać nieabchodnaść raźvićcia». «Ekanomika, u jakoj tak mocna daminuje dziaržava, stračvaje patencyjał pradprymalnikaŭ, kreatyŭnych ludziej. Heta ekanomika pastupova budzie šturchać krainu ŭ bolš hłyboki kryzis z hodu ŭ hod, doŭh budzie ŭzrastać. U rešcie rešt, pytańnie budzie ŭ tym, ci pahłynie vas Rasija, tamu što jana zachoča atrymać svaje hrošy nazad», — miarkuje Biek. 

Kažučy pra pahrozu niezaležnaści Biełarusi, jana zaŭvažyła: «Jość roznyja šlachi straty niezaležnaści — heta nie abaviazkova pavinna aznačać stratu farmalnaha suvierenitetu». 

«Ale heta moža aznačać, što ŭrad i prezident nie buduć svabodnyja ŭ pryniaćci rašeńniaŭ, — zajaviła parłamientaryj. — Naprykład, kali budzie zapyt na pryvatyzacyju, jakuju, jak mnie zdajecca, krainie varta pravieści, ci budzie ŭrad svabodny ŭ vybary pakupnika? Abo jany buduć abaviazanyja pradavać ich rasijskim firmam z-za taho, jaki ŭ ich vialiki doŭh pierad Rasijaj i inšych alternatyŭ niama?» 

«Niemahčymaść vybrać pamiž A i B — heta ŭžo strata niezaležnaści, heta toje, što kraina pavinna abmiarkoŭvać. Ja nie viedaju prezidenta, ja ź im nie sustrakałasia, ale ja časta pytajusia ŭ siabie: što jon dumaje nakont hetaha, z kim jon raicca, chto jaho akružaje», — skazała Biek. 

Na jaje dumku, siońnia biełaruskaja ekanomika nie moža paśpiachova kankuryravać na suśvietnych rynkach. «Niejki čas možna kazać «dobra, nam nie cikavyja suśvietnyja rynki, my budujem svaju ekanomiku». Ale ŭ doŭhaterminovaj pierśpiektyvie heta nie pracuje», — upeŭnienaja deputat bundestaha.

Maryłuize Biek prybyła ŭ Minsk 17 lipienia z dvuchdzionnym vizitam, meta jakoha — vyvučyć na miescy situacyju z pravami čałavieka i palityčnaje stanovišča ŭ krainie. U paviedamleńni ofisa Biek padkreślivajecca: upieršyniu za try hady deputat atrymała dazvoł na ŭjezd u Biełaruś. Niamiecki bok razhladaje heta jak śviedčańnie taho, što Minsk «pasyłaje aściarožnyja sihnały Jeŭrasajuzu» pra hatoŭnaść palepšyć adnosiny. 

U pieršy dzień vizitu Maryłuize Biek sustrełasia z pradstaŭnikami apazicyi i svajakami palitźniavolenych. Na 18 lipienia zapłanavanaja jaje sustreča z pradstaŭnikami Ministerstva zamiežnych spraŭ. 

Daviedka. Maryłuize Biek — śpikier pa pytańniach palityki va Uschodniaj Jeŭropie frakcyi «Sajuz 90/Zialonyja» bundestaha. Naradziłasia 25 červienia 1952 hoda. Vyvučała niamieckuju movu, historyju i hramadaznaŭstva va ŭniviersitetach Bilefielda i Hiejdelbierha. Pracavała nastaŭnicaj u realnaj škole ŭ Pforcchajmie. Člen partyi «zialonych» z 1980 hoda. Z 1983 hoda — deputat bundestaha ź pierapynkami, padčas jakich siarod inšaha źjaŭlałasia deputatam Bremienskaha parłamienta i śpikieram ziamielnaha adździaleńnia partyi «zialonych». Z 1998 pa 2002 hady — upaŭnavažanaja Fiederalnaha ŭrada pa pytańniach inšaziemcaŭ. Z 2002 pa 2005 hady — parłamiencki stats-sakratar pry fiederalnym ministry pa spravach siamji, pažyłych hramadzian, dziaciej i moładzi, adnačasova — upaŭnavažanaja Fiederalnaha ŭrada pa pytańniach mihracyi, biežancaŭ i intehracyi. Z 2005 hoda — člen kamiteta pa źniešniaj palitycy bundestaha, člen Parłamienckaj asamblei Savieta Jeŭropy.

• 0
• 0
• 0
• 0
• 0
• 0
• 0
• 0