Ź Sieuła — u Minsk. Karejski futbolny lehijanier raskazaŭ pra žyćcio ŭ Biełarusi, ježu i słužbu ŭ armii
Biełaruskija zaŭziatary ŭžo pryzvyčailisia da futbolnaj ekzotyki: na našych palach kaho tolki nie było — ad brazilcaŭ da kamieruncaŭ, ad ispancaŭ da finaŭ. Ale abaronca z Paŭdniovaj Karei Park Džychun, jaki vystupaje za FK «Minsk», navat na hetym fonie vyłučajecca — karejskija hulcy ŭ našaj lizie vialikaja redkaść. U intervju «Anłajnieru» Park raskazaŭ, jak apynuŭsia ŭ Biełarusi, što palubiŭ ź miascovaj kuchni, čym jaho ździviła naša kraina i jak jon rychtujecca da słužby ŭ karejskaj armii.
«Nazyvajcie mianie Artur»
Z vysokim brunietam, bolš padobnym da ŭdzielnika karejskaha bojz-benda, žurnalisty sustrelisia ŭ HC Galleria — i adrazu ździvilisia jaho vitańniu. «Artur», — praciahvajučy ruku, kaža na łamanaj ruskaj movie futbalist. Surazmoŭcy, viadoma, byli ašałomlenyja: jaki Artur, kali va ŭsich futbolnych pratakołach jon značycca jak Park Džychun. Ale chłopiec spakojna prysadžvajecca za stoł i, časam spatykajučysia na składanych słovach, pačynaje ŭsio tłumačyć.
U pačatku nulavych jahony baćka vyrašyŭ vyvučycca na kuchara i adpraviŭsia atrymlivać adukacyju ŭ Maskvu, dzie paznajomiŭsia sa svajoj budučaj žonkaj. Praź niekatory čas para pierajechała na radzimu žonki — u Novasibirsk, dzie i naradziŭsia budučy futbalist.
— Tak što Artur — heta majo imia na ruskaj movie. Majo karejskaje imia mnohim składana vymavić, tamu i nazyvajuć mienavita tak, — uśmichajecca chłopiec.
Na žal, mama Artura nieŭzabavie pamierła, i razam z baćkam jon pierajechaŭ na jaho radzimu — u Sieuł. Z rańniaha dziacinstva chłopčyk palubiŭ futboł i ŭvieś volny čas pryśviačaŭ sportu ci pravodziŭ jaho razam z tatam.
— Čamu ja tak zacikaviŭsia futbołam? Dy nie viedaju. Prosta ź dziacinstva pastajanna ŭ jaho hulaŭ. A, napeŭna, u 15 hadoŭ zrazumieŭ, što chaču stać prafiesijnym futbalistam. Chacia niejki čas dumaŭ pra pracu ŭ kaviarni, ale heta było jašče ŭ dziacinstvie. U vyniku ja ŭsio adno vybraŭ futboł. Jak adreahavaŭ tata? Spačatku nie vielmi: kazaŭ, što budzie ciažka, pryjdziecca kožny dzień treniravacca i być u dobraj formie. Adnak z časam jon mianie padtrymaŭ.
Prafiesijnuju karjeru Artur pačaŭ u Paŭdniovaj Karei. Adnak siarod miascovych hulcoŭ vysokaja kankurencyja, tamu razam z baćkam jany vyrašyli pasprabavać siły za miažoj. Tak u 2020‑m karejec źjechaŭ u Kazachstan — u kamandu SDIUŠAR-8.
Paźniej Artur navat moh trapić u znakamity «Kajrat», jaki niadrenna našumieŭ niadaŭna ŭ jeŭrakubkach, adnak pierachod nie adbyŭsia — nie znajšłosia miesca dla lehijaniera. U vyniku Park viarnuŭsia ŭ čempijanat Paŭdniovaj Karei, u «Čandžu» z čaćviortaj lihi.
— Heta paŭprafiesijny čempijanat. Ale ŭzrovień tam niadrenny, pakolki možna sustreć futbalistaŭ z vopytam vystupleńniaŭ u Vyšejšaj lizie. Razam sa mnoj hulali chłopcy, jakija atrymali adterminoŭku ad armii praz chvarobu, niechta pracavaŭ aficyjantam. Płacili tam prykładna $500—700. Dla čaćviortaj lihi heta byli siarednija zarobki.
Tam byli kłuby, u jakich možna było zarablać bolš za $2000, a z bonusami za pieramohi — usie $3000—4000.
A ŭ Biełarusi raniej hulali futbalisty z Paŭdniovaj Karei?
Da Parka ŭ našym čempijanacie hulaŭ tolki adzin karejec — Kim Čžun Jen. U 2020 hodzie jon padpisaŭ kantrakt ź minskim «Dynama», ale zamacavacca nie zmoh: pravioŭ usiaho dva matčy i ŭžo ŭ siaredzinie leta pakinuŭ kamandu.
«Mnie padabajecca hulać pa Niamizie. Tam jak u Jeŭropie»
Adhulaŭšy doma paŭhoda, Park znoŭ adpraviŭsia ŭ Kazachstan, zatym krychu pahulaŭ u Kyrhyzstanie i Hruzii (za kamandu z Zuhdzidzi), a ŭ žniŭni 2025 hoda padpisaŭ kantrakt z «Minskam».
— Praz kazachstanskaha ahienta ja paznajomiŭsia ź biełaruskim mieniedžaram Uładzimiram Pachomienkam, i jon prapanavaŭ mnie varyjant u Biełarusi. Ja adrazu pahadziŭsia i palacieŭ u Minsk. Jakija pieršyja ŭražańni? Kareja, Kyrhyzstan, Kazachstan nie padobnyja da Jeŭropy, a tut usio zusim inakš. Nadvorje, ludzi, restarany — heta ŭsio nahadvaje Zachad. Asabliva mnie padabajucca ŭstanovy ŭ rajonie Niamihi. Da mianie ŭ minułym hodzie prylataŭ tata. My hulali, jeli picu, pastu, i nam spadabałasia. Nu i asabliva padabajecca nadvorje i čystyja vulicy.
U Minsku mnie žyviecca dobra i vielmi padabajecca pa im hulać, vyvučać jaho. Ja rady, što tut apynuŭsia.
Chłopiec uzhadvaje, što ŭ kamandzie praz adaptacyju spačatku było niaprosta. Jon mała hulaŭ, i pryvyknuć u cełym było składana. Na dapamohu ŭ ciažkuju chvilinu prychodziŭ vopytny Eduard Žaŭniaroŭ.
— Jon dobry i nie žorstki čałaviek, — uśmichajecca Artur. — Jon pieršy z kamandy, chto pačaŭ mnie dapamahać. Edzik — baćka: u jaho ŭžo jość dačka, i Žaŭniaroŭ dumaje, na moj pohlad, jak darosły čałaviek. Jon uziaŭ mianie pad svaju apieku, vydatna dapamoh. Zaraz jon užo ŭ inšaj kamandzie.
— A jak inšyja chłopcy kamunikujuć z taboj?
— Maładyja šmat žartujuć. Naš bramnik mianie čamuści nazyvaje kitajcam, choć ja nie maju da ich nijakaha dačynieńnia. Jašče adzin chłopiec korčyć roznyja hrymasy. Mnie nie vielmi padabajecca, i ja pra heta kažu, ale razumieju, što jon tak žartuje.
Biełarusy bolš surovyja, čym karejcy
— Biełarusy, na moj pohlad, bolš emacyjnyja, čym karejcy, — ličyć Park. — Roźnica asabliva zaŭvažnaja ŭ kanfliktnych situacyjach. Kali niešta adbyvajecca, biełarusy mohuć spakojna razabracca na miescy — prosta razyjducca abo pamiracca. Takoje lohka ŭjavić. U Karei ŭsio inakš. U padobnych vypadkach — naprykład, kali sprava dachodzić da bojki — amal napeŭna adrazu vykličuć palicyju i možna budzie atrymać surjozny štraf. Tamu karejcy razumiejuć nastupstvy i imknucca nie tak adkryta prajaŭlać emocyi. Jany viedajuć, čym heta moža abiarnucca.
«U Karei papularny futboł, u Biełarusi — chakiej»
Biełaruski futbalist jamu bačycca zatočanym na baraćbu, adzinaborstvy i dobruju fizičnuju padrychtoŭku.
— U Paŭdniovaj Karei ŭ hetym płanie patrabavańni jašče vyšejšyja: na poli davodzicca bolš biehać. Liha ŭsio ž macniejšaja. Nu i hałoŭnaja roźnica — tam bolš vysokija zarobki ŭ hulcoŭ. U miesiac jany mohuć zarablać pa $100 000, a to i bolš.
— Uzimku chadzili čutki, što najlepšy futbalist Biełarusi Valeryj Hramyka moža pajechać u Paŭdniovuju Kareju — u FK «Sieuł».
— Heta mocnaja kamanda. U hetym hodzie ŭ jaje była dobraja sieryja z čatyroch pieramoh zapar. Da taho ž heta staličny kłub, u jakoha, viadoma, šmat zaŭziataraŭ: na matčy mohuć prychodzić pa 30—40 tysiač hledačoŭ. Dumaju, «Sieuł» uvachodzić u piaciorku samych papularnych kłubaŭ krainy. Ale ŭ vas bolš papularny inšy vid sportu — chakiej. Ja niadaŭna schadziŭ na matč pamiž «Junactvam» i «Niomanam». Byŭ na chakiei ŭpieršyniu ŭ žyćci, i mnie vielmi spadabałasia. Hulnia była žorstkaj, ja navat čakaŭ, što pačniecca bojka, ale abyšłosia bieź jaje.
«Padabajecca biełaruski chleb»
U Minsku Artur žyvie na bazie futbolnaha kłuba, pobač sa stancyjaj mietro «Aŭtazavodskaja». Čas ad času jon viačeraje ŭ centry horada: addaje pieravahu piceryjam i kaviarni Coffee Embassy, dzie zamaŭlaje stravu blizkaŭschodniaj kuchni — šakšuku, sušy biare zvyčajna ŭ Ronin i časam zachodzić navat u fastfudny KFC — kuplaje sabie boksmajstar. Na pytańnie pra spartyŭnuju dyjetu jon z uśmieškaj adkazvaje: «Kali krychu i časam, to možna».
Byvaŭ jon i ŭ staličnym karejskim restaranie «Pusan». Kaža, hatujuć tam niadrenna, ale, na jaho dumku, ježa nie zusim padobnaja da sapraŭdnaj karejskaj.
Pry hetym Park lubić hatavać sam i, što dziŭna, navučyŭsia hetamu samastojna, a nie pad kiraŭnictvam baćki-kuchara. Pa pradukty chodzić u zvyčajnyja biełaruskija kramy i navat byvaje na Kamaroŭskim rynku — biare tam harodninu i miasa. Čaściej za ŭsio hatuje stravy karejskaj kuchni: čchejuk pakkym (vostraja śvinina, absmažanaja z sousam i harodninaj), samhiopsal (strava sa smažanaj hrudzinki), kimčy ččyhe (vostry sup z kimčy)…
— Ź biełaruskaj ježy mnie padabajucca draniki, bulba, chleb. Nu a čaściej ja kuplaju pradukty i hatuju ź ich niejkija karejskija stravy. Kali jem z kamandaj, nam časam dajuć makarony, piure. I, kali ščyra, u vašaj krainie jašče nie bačyŭ straŭ, jakija jeści nie chaciełasia b.
A voś u Siaredniaj Azii z padobnym sutykaŭsia — heta kanina. Raz pasprabavaŭ i bolš nie chaču.
— U biełaruskich kramach jość karejskija pradukty?
— Praktyčna niama. Chiba što sous. Bułdak? (vostraja łokšyna chutkaha pryhatavańnia. — Zaŭv. «Anłajniera»). Ale heta nie vielmi dobraja ježa dla futbalistaŭ. Ja časam łokšynu hatuju doma, ale pierahinać ź joj nie treba. Jašče bačyŭ u vas napoj «Sodžu». Ale jon z fruktovymi smakami, napeŭna. U Karei taki nie lubiać — addajuć pieravahu čystamu, kłasičnamu. Z dadatkami bolš dla dziaŭčat padydzie.
— A jak tabie biełaruskija ceny?
— Na pradukty jany nižejšyja, čym u Paŭdniovaj Karei. A voś što tyčycca, naprykład, krasovak (u Minsku ja kuplaŭ sabie Nike), za dobruju paru mnie pryjšłosia vykłaści kala $200. U Karei jany abyducca ŭ sotniu.
«Rychtujusia da armii — zimoj mianie, chutčej za ŭsio, pryzavuć»
U novym siezonie Park užo debiutavaŭ za «Minsk» — pravioŭ matč suprać «Homiela», jaki zaviaršyŭsia pieramohaj jaho kamandy. Tak što całkam mahčyma, što trenier budzie raźličvać na lehijaniera i dalej. Kantrakt z kłubam padpisany jak minimum da kanca hoda — da 31 śniežnia. Što budzie dalej, pakul nieviadoma. Urešcie, sam Park nie chavaje: užo hetaj zimoj jaho płanujuć zabrać u armiju.
— Paśla taho jak tabie spoŭniłasia 19, treba raz u piać hadoŭ prachodzić miedycynskaje abśledavańnie. Ja prachodziŭ jaho minułaj zimoj (z-za čaho paźniej, čym treba, pryjechaŭ u Biełaruś) i akazaŭsia prydatnym. Budučaj zimoj, napeŭna, mianie pryzavuć i pryjdziecca iści słužyć. Mahčyma, na paŭtara hoda. Varyjantaŭ niama. Inakš daduć zapyt na vyšuk u Interpał.
Ci bajusia ja? Trochi, tamu što takoha vopytu ŭ maim žyćci pakul nie było. Ale tam niama dziedaŭščyny, dazvalajuć karystacca mabilnym telefonam u peŭny čas, płaciać hrošy. Kolki? Płanujuć tysiaču dalaraŭ.
— Ja čytaŭ, što spartsmienaŭ hatovyja vyzvalać ad armii za vielmi vysokija dasiahnieńni na mižnarodnaj arenie. Heta praŭda?
— Kali zbornaja Paŭdniovaj Karei nie zajmaje pieršaje miesca ŭ čempijanacie Azii, to futbalisty pavinny iści ŭ armiju. Tak było, naprykład, z Son Chyn Minam, jakomu ŭsio roŭna pryjšłosia niejki čas pravieści ŭ armii (pravioŭ trochtydniovuju padrychtoŭku ŭ marskoj piachocie. — Zaŭv. «Anłajniera»).
— Mahčyma, u vas jość armiejskaja kamanda nakštałt CSKA, na bazie jakoj možna prajści słužbu?
— Tak, «Kimčchon Sanmu». Heta kamanda hulaje ŭ Vyšejšaj lizie i ŭ minułym hodzie zaniała treciaje miesca. Za jaje vystupajuć futbalisty, jakija prachodziać vajskovuju słužbu. Ja, viadoma, taksama chacieŭ by tudy trapić, ale heta vielmi składana — achvotnych šmat. Tym nie mienš zhulać za hetu kamandu — maja nievialikaja mara. Ale pakul ja ŭ Biełarusi i budu staracca dapamahčy svajmu kłubu.
«Spačatku było ciažka, a potym zvykaješ». Eks-hulec zbornaj Biełarusi vosiem miesiacaŭ pravioŭ u ŁPP
Biełaruskaja dyjaspara — samaja šmatlikaja siarod lehijanieraŭ u vyšejšaj futbolnaj lizie Kazachstana
Nazvali samaha bahataha atleta za ŭsiu historyju suśvietnaha sportu
Kapitan zbornaj Maroka admoviŭsia ad trafieju Kubka Afryki pacla parady maci
Amal usie čaty i supołki kałonij i SIZA Biełarusi pryznali ekstremisckimi farmavańniami. Pad pahrozaj tysiačy čałaviek4
Kamientary