Saviet Ministraŭ Biełarusi pryniaŭ pastanovu numar 850 ad 29 žniŭnia 2014 hoda, jakaja datyčycca likvidacyi vajennych prakuratur, paviedamili ŭ pres-słužbie biełaruskaha ŭrada.
Dakumient pryniaty ŭ raźvićcio ŭkaza numar 137 ad 26 sakavika 2014 hoda «Ab likvidacyi vajennych prakuratur» i ŭnosić źmianieńni ŭ roznyja pastanovy, jakija datyčacca dziejnaści, u tym liku vajennych prakuroraŭ. Z hetych dakumientaŭ vyklučajecca adpaviednaja terminałohija.
Naprykład, u pałažeńni ab miedycynskim zabieśpiačeńni vajennasłužačych, asob, zvolnienych z vajennaj słužby, členaŭ ich siemjaŭ, invalidaŭ VAV i invalidaŭ ź liku vajennasłužačych, jakoje było zaćvierdžana pastanovaj Saŭmina numar 814 ad 2 śniežnia 1993 hoda (a potym unosilisia źmianieńni inšymi pastanovami) termin «vajenny prakuror harnizona» zamianiajecca słovam «prakuror». Anałahičnyja źmianieńni ŭniesieny i ŭ mnohija inšyja dakumienty. Pastanova ab hetym ustupiła ŭ siłu z 1 vieraśnia 2014 hoda.
Jak paviedamlałasia raniej, u Biełarusi byli taksama likvidavany vajennyja sudy. Hetyja struktury byli skasavany z 1 lipienia, što było adnoj z častak sudovaj reformy. Svajo isnavańnie spynili šeść mižharnizonnych sudoŭ, Biełaruski vajenny sud i Vajennaja kalehija Viarchoŭnaha suda, a taksama kanfierencyja i kvalifikacyjnaja kalehija sudździaŭ vajennych sudoŭ.
Akramia taho, 26 červienia byŭ padpisany ŭkaz numar 297 «Ab naznačeńni i vyzvaleńni sudździaŭ sudoŭ Respubliki Biełaruś i pytańniach dziejnaści sudovaj sistemy». U dakumiencie, u pryvatnaści, havaryłasia, što z 1 lipienia bolš jak 10 vajennych sudździaŭ vyzvalajucca sa svaich pasad i stanoviacca sudździami Viarchoŭnaha suda i inšych ahulnych sudoŭ. Taksama dvoje vajennych sudździaŭ pajšli ŭ adstaŭku, a adzin vyzvaleny z pasady ŭ suviazi ź pierachodam na inšuju rabotu.
Źniavoleny raskazaŭ, jak siadzieŭ u kałonii ŭ Hłybokim u susiedniaj kamiery sa Statkievičam3
Kamientary