Kniha Romy Śviečnikava ''Roma jedzie'' (vydaviectva ''Łohvinaŭ») napisanaja dvaccacihadovym biełarusam, jaki vypraviŭsia ŭ biesterminovuju kruhaśvietku.
Maršrut Romy praloh praz Hruziju, Armieniju, Iran, Azierbajdžan, Rasiju, Manholiju, Kitaj, Łaos Tajłand… Aŭtar naziraje žyćcio ŭ hetych krainach, piša zaciemki, robić videa, fatahrafii, aŭdyjoŭklučeńni z tych miaścin, dzie vandruje, i dasyłaje ich u internet-časopis 34mag.net.
Redaktar knižki ŭ pradmovie zaznačaje, što treba ŭziać prykład z Romy i navažycca na takoje padarožža, kab zazirnuć uhłyb ułasnaha lusterka. Bo heta kniha — unikalny biaspłatny navučalny kurs pa dyzajnie žyćcia. Roma źmianiŭ žyćciovuju paradyhmu, kab znajści svoj ŠLACH, stać mastakom svajho žyćciovaha pałatna, znajści siabie ŭ hetym składanym śviecie…
Kniha bahata ilustravana, ale na fota niama aŭtarskaha samalubavańnia: Roma na trecim płanie. Zdymki majuć svajo žyćcio i mohuć navat skłaści fotavystavu. Z adnaho boku, jany dapamahajuć zrazumieć tekst, z druhoha — usprymajucca samastojna. Jak kniha ŭ knizie.
Kniha Śviečnikava nievialikaja pa pamierach, ''kišennaha'' farmatu. Jaje lohka možna ŭziać u padarožža.
U knizie amal adsutničaje apisańnie pryhažości pryrody, niama paradaŭ turystam i pakazu najcikaviejšych miaścin, jakija varta naviedać. Hetaje vandravańnie maje štości ahulnaje z bamžavańniem.
Romu davodziłasia spać na vulicy, dajadać u ''Makdonaldsie'' za inšymi, ''tyryć'' u kramach, mierznuć pad śnieham, tłumačycca z palicyjaj, čuć nieprystojnyja prapanovy z boku mužčyn, prasić miłaścinu na kvitok — i ŭnutry śmiajacca. Śmiajacca z taho, jak usio ŭładkavana. Bo Roma viedaje: siła ŭ praŭdzie, a jašče — u viery, rašučaści i maładości!..
Raniej daroha vabiła volaj. A ciapier piersanifikavałasia ŭ dziaŭčynu Volu Palevikovu, ź jakoj aŭtar vandravaŭ pa darohach Padniabiesnaj na matacykle Honda. Čytač tolki moža zdahadacca, jak maładyja ludzi pakachali adno adnaho, bo Roma pra pačućci ničoha nie piša… Choć naš hieroj napačatku radavaŭsia samocie, usio ž vyrašyŭ ź joju raźvitacca. Absalutnaja svaboda stała jamu nie patrebnaj. Bo heta ideał dla varjataŭ i słabakoŭ. Da takoj vysnovy prychodzić Roma ŭ svaich razvažańniach i dalej płanuje vandravać razam z Volaj. Jany laciać z Kuała-Łumpura( Małajzija ) u Łos-Andželes. Zamiest zvykłaha 'ja'', Roma vykarystoŭvaje zajmieńnik usich zakachanych - ''my''… Na hetym zakančvajecca pieršaja kniha.
Nie viedaju, jak vy, a mnie b chaciełasia atrymać jaje praciah. I vielmi chaču ŭpeŭnicca, što Roma stała pryjšoŭ u biełaruskuju litaraturu. Na adnaho kankurenta ŭ baraćbie za premiju ''Debiut - 2014'' stała bolej.
Ciapier čytajuć
Amal usie čaty i supołki kałonij i SIZA Biełarusi pryznali ekstremisckimi farmavańniami. Pad pahrozaj tysiačy čałaviek6
Kamientary