16-hadovuju, što zahinuła ŭ avaryi na Vaniejeva, prosta padvozili na zaniatki pa anhlijskaj movie

7 listapada ŭ Minsku ŭ avaryi na vulicy Vaniejeva kampanija na Dodge ŭrezałasia ŭ lichtar. 16-hadovaja školnica zahinuła na miescy, a jaje siabroŭka-pieršakurśnica skanała ŭ balnicy.

18-hadovy kiroŭca, jak miarkujecca, nie spraviŭsia z kiravańniem na pavarocie i ŭjechaŭ u lichtarniu. Kiroŭca (pravy atrymaŭ tolki dva miesiacy nazad) i jašče dvoje pasažyraŭ zastalisia žyvyja.

«Daryna jechała da babuli zajmacca anhlijskaj movaj (jana vykładaje ŭ škole). Pozna vyjšła i, jak my miarkujem, paprasiła siabroŭku padvieźci, — raskazała «NN» druhaja babula školnicy Safija. — Daryna žyła na Bieruta, a jechała ŭ Sierabranku.

I ja patelefanavała joj u 9.45. Viasiołaja takaja była, źbirałasia taksi brać. I toj babuli skazała pra taksi. A ŭ 11 hadzin skazała, što ŭžo jedzie. I taja babula pačała joj telefanavać, kali jana ŭžo nie źjaviłasia. Pačała abzvońvać taksaparki, a tam skazali, što z taho adrasa taksi nie vyklikali. A paśla ŭžo synu patelefanavali. Jany z małodšymi dziećmi byli ŭ Polščy na vychadnych: u čaćvier pajechali, a ŭ piatnicu im užo pazvanili. Daryna — starejšaja ŭ siamji, adnamu chłopčyku 11 hadoŭ, druhomu chutka 4».

Daryna ŭ nastupnym hodzie pavinna była skončyć staličnuju himnaziju №1. Chacieła jechać vučycca ŭ Polšču. Ceły žnivień tam zajmałasia polskaj movaj.

«Mnie ŭ kamientaryjach na sajcie napisali: źmiryciesia, chadzicie na mohiłki, ale jon (kiroŭca) budzie chadzić pa ziamli. Pasiadzić u turmie, a paśla jaho adpuściać… A maja dziaŭčynka navat ni z adnym chłopcam nie sustrakałasia. Navat saromiełasia, kali my zahavorvali pra heta: «Babula, nu ty što, mnie ciapier vučycca treba — jakija chłopčyki». Kaniečnie, mahčyma joj niechta padabaŭsia, ale nie sustrakałasia. Usio addavała vučobie, — ledź strymlivaje ślozy Safija. — U jaje dva małodšyja braciki. Voś dziela ich jašče… A voś dziaŭčynka ŭ mianie adna…

13 studzienia joj spoŭniłasia b 17 hadoŭ. Ja ciapier nienavidžu ličbu 13. I ŭvohule nie mahu na maładych hladzieć. Učora išła, nasustrač dziaŭčynki jaje ŭzrostu, uśmichajucca — tak serca zabaleła».

U «Dodžy» ŭ toj dzień jechali dźvie pary, a Darynu ŭzialisia tolki padvieźci. A Hanna, jakaja pamierła ŭžo ŭ balnicy, była lepšaj siabroŭkaj Daryny. Jana vučyłasia ŭ BNTU, mieła tolki 17 hadoŭ.

«Dodž», jak vyśvietliłasia, byŭ uziaty na prakat siabram kiroŭcy. Uładalnik mašyny paśla avaryi ŭ sacyjalnych sietkach pryznaŭsia, što zdaŭ mahutnaje aŭto za butelku darahoha ałkaholu. Praŭda, ranicaj 10 listapada małady čałaviek užo admoviŭsia razmaŭlać z karespandentam «NN».

«Biez kamientaryjaŭ», — i kinuŭ słuchaŭku.

Śledčy kamitet zavioŭ kryminalnuju spravu za parušeńnie PDR, što paciahnuła dźvie śmierci. Pa słovach pradstaŭnika USK pa Minsku Alaksandra Hierasimava, kiroŭca ŭ momant avaryi byŭ ćviarozy. Miera strymańnia nie abirałasia.

Apytanka

• 0
• 0
• 0
• 0
• 0
• 0
• 0
• 0