Ukraincy znoŭ źbirajuć hrošy na hulniu «Stalker»
Studyja West Games, zasnavanaja raspracoŭščykami «S.T.A.L.K.E.R», źbiraje praź internet 600 tysiač dalaraŭ na hulniu «Stalker Apocalypse». Ad staroha prajekta ŭ suśviecie stałkieraŭ, «Areal», studyja admoviłasia, raspaviadaje Kanobu.
U červieni 2014 hoda West Games, štat jakoj naličvaje 11 čałaviek, abvieściła ab raspracoŭcy Areal, «duchoŭnaha naščadka» papularnaj sieryi hulniaŭ «S.T.A.L.K.E.R», i pačała zbor hrošaŭ. Placoŭka Kickstarter u chutkim časie zakryła zbor hrošaŭ biez tłumačeńniaŭ. Raspracoŭščyki Areal patłumačyli heta skandałami z kankurentami i dziejańniami nienaviśnikaŭ z Rasii.
Zaraz West Games zapuściła kampaniju pa zboru srodkaŭ na novuju hulniu ŭžo nie na papularnym Kickstarter, a na mieniej viadomym World Wide Funder. Kampanija prosić užo nie miljon dalaraŭ, a 600 tysiač. Hulnia ciapier zaviecca «Stalker Apocalypse», ale rabicca jana budzie pa napracoŭkach «Areal».
Kampanija pa zbory srodkaŭ skončvajecca 12 sakavika 2015 hoda. U vypadku pośpiechu vychad «Stalker Apocalypse» płanujecca na žnivień 2016 hoda.
Sieryja hulniaŭ «S.T.A.L.K.E.R» sumna viadomaja, ale lubimaja hulcami. Ab płanach pa raspracoŭcy hulni pa matyvach apaviadańnia «Piknik na ŭzbočynie» bratoŭ Struhackich było abvieščana jašče ŭ 2001 hodzie. Data vychada hulni šmat razoŭ mianiałasia, a sama hulnia paśpieła źmianić ruchavik, nazvu i vydaŭca. U vyniku ŭ 2007 hodzie vyjšła hulnia «S.T.A.L.K.E.R: Cieni Čarnobyla», u jakuju nie trapili mnohija abiacanyja mahčymaści (u tym liku adkryty suśviet). Hulnia atrymała pazityŭnyja vodhuki jak u postsavieckich krainach, tak i na Zachadzie, ale papularnaj była pieravažna ŭ Rasii, Biełarusi i Ŭkrainie. U 2008 i 2009 hodzie sieryja papoŭniłasia hulniami «Čystaje Nieba» i «Klič Prypiaci». Raspracoŭka «S.T.A.L.K.E.R 2» była abvieščanaja ŭ 2010 hodzie, ale spynienaja ŭ kancy 2011-ha praz zakryćcio studyi-raspracoŭščyka GSC Game World. Pravy na brend zastalisia ŭ zasnavalnika GSC Siarhieja Hryharoviča. Ab raspracoŭcy «naščadka Stałkiera» abvieścili dźvie kampanii, supracoŭniki jakich majuć dačynieńnie da aryhinalnaha «Stałkiera». Fanaty tymčasam robiać madyfikacyju «Lost Alpha», jakaja viartaje ŭ aryhinalnyja «Cieni Čarnobyla» ŭsie abiacanyja, ale nie realizavanyja mahčymaści.
Kamientary