Kampanii ŭkaraniajuć ŠI-dvajnikoŭ supracoŭnikaŭ

Kampanii pačali vykarystoŭvać ličbavych dvajnikoŭ supracoŭnikaŭ, kab pavysić pradukcyjnaść i źnizić zaležnaść ad najmu, piša devby.io. Adzin z takich prykładaŭ — Ryčard Skielet, hałoŭny analityk pa daśledavańniach i dyzajnie kansałtynhavaj firmy Bloor Research. U intervju BBC jon raspavioŭ, što za try hady stvaryŭ ličbavuju kopiju samoha siabie. Technałahična «ličbavy Ryčard» — heta piersanalnaja ŠI-madel, navučanaja na pracoŭnych danych kankretnaha čałavieka.

Dvajnik navučany na sustrečach, dakumientach i pierapiscy i pierajmaje styl myśleńnia ŭładalnika, dapamahajučy prymać rašeńni i rychtavać prezientacyi. U vyniku atrymaŭsia tekstavy interfiejs — pa sutnaści, čat z ułasnaj ličbavaj kopijaj, da jakoj možna źviartacca pa parady, analityku i dapamohu.

U sistemy jość asobnyja ŭkładki, naprykład «family» i «admin», dostup da jakich zakryty dla kaleh — jany mohuć źviartacca da ličbavaha dvajnika tolki pa biznes-pytańniach.

Z časam «ličbavy Ryčard» staŭ asnovaj dla maštabavańnia technałohii ŭnutry Bloor Research: pa jaho madeli stvaryli ličbavych dvajnikoŭ dla ŭsioj kamandy z prykładna 50 supracoŭnikaŭ u Vialikabrytanii, Jeŭropie, ZŠA i Indyi.

U Bloor Research kažuć, što technałohija dapamahaje ŭ kadravaj palitycy: naprykład, pastupova vyvodzić ludziej na piensiju abo časova zamianiać kaleh — biez najmu časovych supracoŭnikaŭ. Jašče 20 inšych kampanij užo testujuć hetuju technałohiju, i jana budzie šyroka dastupnaja inšym u kancy hetaha hoda.

Padobny padychod vykarystoŭvaje Džoš Biersin, zasnavalnik kansałtynhavaj kampanii The Josh Bersin Company. Jon nazyvaje hetuju technałohiju «supierrabotnikam» — kali ŠI ŭzmacniaje mahčymaści čałavieka. «U ludziej niama sił na jašče adzin zvanok. Ale vy možacie razbudzić ličbavaha dvajnika pasiarod nočy i havaryć ź im hadzinu — jamu ŭsio roŭna. Heta nievierahodna kaštoŭna», — tłumačyć jon.

Pa słovach Biersina, dziakujučy ličbavym kopijam supracoŭnikaŭ kampanija raście prykładna na 30% u hod, ale pry hetym najmaje ŭsiaho adnaho-dvuch novych śpiecyjalistaŭ štohod. «Ekanamičnaja kaštoŭnaść kožnaha čałavieka raście. Kali vy stanoviciesia kaštoŭnym ličbavym elemientam kampanii, čamu b joj nie płacić vam bolš?» — dadaje jon.

Adnak razam ź pieravahami ŭźnikajuć i surjoznyja pytańni. Ekśpierty spračajucca ab tym, kamu naležyć ličbavy dvajnik — supracoŭniku ci pracadaŭcu, i chto niasie adkaznaść za jaho dziejańni.

«Jak tolki ŠI navučajecca na listach, sustrečach i pracoŭnych materyjałach čałavieka, vy sutykajeciesia z pytańniami, jakija lažać u samym centry pracoŭnych adnosin: zhoda, kantrol piersanalnych danych, zamiaščeńnie pracy i toje, što adbyvajecca, kali čałaviek sychodzić z kampanii», — adznačaje juryst Andžali Malik z Bellevue Law.

Analityki Gartner prahnazujuć, što ličbavyja dvajniki supracoŭnikaŭ mohuć stać masavaj źjavaj užo ŭ najbližejšy čas. Ale pakul rynak tolki farmujecca, i pravavyja normy nie paśpiavajuć za technałohijaj. «Dumaju, my, chutčej za ŭsio, spačatku ŭbačym niehatyŭny bok hetaha miedala, pierš čym prajavicca stanoŭčy», — papiaredžvaje daśledčyca Gartner Kiejlin Łoŭmaster.

• 0
• 1
• 3
• 1
• 2
• 0
• 2
• 0