Zasnavalnik partała litkritika.by: Ja b i krainu pierajmienavaŭ, bo słova «Ruś» siabie dyskredytavała

Alaksandr Novikaŭ, zasnavalnik partała litkritika.by, šmat kryvi sapsavaŭ biełaruskim piśmieńnikam. Vajavaŭ z «nacyjanalistami», vinavaciŭ u hrafamanstvie navat Buraŭkina z Baradulinym. Jak ža my byli ździŭlenyja, kali pabačyli na internet-staroncy hetaha krytyka… rezkuju krytyku Pucina i pavodzin Rasii va Ukrainie! Voś što raspavioŭ «Našaj Nivie» sam Novikaŭ.

Apazicyjaniery i revalucyjaniery

Ja — patryjot. Ź dziaržavaj ja nikoli nie vajavaŭ, i ŭvohule nie padzialaju krainu, Radzimu i dziaržavu. Dla mianie heta ŭsio adno. Ja za mocnuju i niezaležnuju Biełaruś. A našaja apazicyja — heta revalucyjaniery. Apazicyjanier pavinien być u apazicyi da ŭłady, finansavacca miascovym nasielnictvam ci biznesoŭcami. A našyja tolki dekłarujuć: «Dałoŭ Łukašenku!». Pałova žyvie za miažoj, finansujecca adtul ža.

Ciapier ža narmalnaja apazicyja tolki pačynaje źjaŭlacca. I adbyvajecca heta z-za taho, što robić Rasija. Toj ža Łobaŭ, jaki kaža, što lepš z Łukašenkam, čym z Pucinym, — małady, razumny chłopiec. My faktyčna karaleŭstva, ja pryznaju, ułada — u rukach adnaho čałavieka. Ale čynoŭniki robiać svaje spravy. Ja, praŭda, liču, što atačeńnie prezidenta nie daje ŭsioj infarmacyi prasočvacca da jaho. Toj ža ŭkaz, skiravany na ipešnikaŭ, jon ža pracuje suprać Łukašenki. Ja liču, heta nie jaho ideja — heta Kabiakoŭ i Prakapovič.

Movafiły i biełarusizacyja

Movafiły — heta tyja, chto lubić movu napakaz. Kali Uładzimir Lipski kaža: «Ja vymaŭlaju «Biełaruś» i płaču!», to heta narmalna? Chiba jon sapraŭdy płača? Da ludziej, jakija ščyra razmaŭlajuć na biełaruskaj, ja staŭlusia narmalna. Bolš za toje, ja padtrymlivaju raspaŭsiudžvańnie biełaruskaj movy. Ja liču, što treba być nacyjaj i iści da adnoj dziaržaŭnaj movy. I treba, kab pryniali prahramu na dziaržaŭnym uzroŭni ab tym, što spravavodstva ŭsio pierachodzić na biełaruskuju movu.

Tak, možna dać ludziam peŭny termin, kab jany jaje vyvučyli, naprykład, hadoŭ 5. A potym prosta nie brać na dziaržaŭnuju pracu tych, chto nie viedaje biełaruskaj. Usio aficyjnaje žyćcio pavinna iści pa-biełarusku, navat telebačańnie treba pieravieści pieravažna na biełaruskuju movu.

Ja b, ščyra kažučy, i krainu pierajmienavaŭ, bo ja suprać słova «Ruś». Ruś siońnia sabie dastatkova skampramietavała. Niachaj by nazvali niejak inakš, dy choć «Škłoŭskaje karaleŭstva»…

Majdan aktyvizavali rasiejskija śpiecsłužby

Ja viedaju žyćcio va Ukrainie. I kali pačaŭsia Majdan, ja zrazumieŭ, što ludziej prosta daviali. Majdan zrabiŭ nie Zachad, a faktyčna sam Janukovič. A aktyvizavali rasiejskija śpiecsłužby, kali pačali zabivać ludziej. Siońnia nie źviartać uvahi na Ukrainu nielha. I ja nie razumieju zasilla rasiejskaj prapahandy. Kazaki, inšyja čarnasociency ciapier aktyvizujucca. Kudy hladziać śpiecsłužby? Ja zhodzien, kali Rasiju paraŭnoŭvajuć z hitleraŭskaj Hiermanijaj. Heta tak.

Ciońnia situacyja z Ukrainaj dakładna pakazała, što takoje Rasija, i jakija ludzi tam žyvuć, i jakija ludzi kirujuć. Kreml hvałciŭ krainu jašče ŭ savieckija časy i praciahvaje rabić heta i ciapier. I dziŭna, ale šmat kamu heta padabajecca. I nie treba kazać, što raniej my žyli ŭ brackaj zhodzie, nie. Uspomnicie chacia b biaskoncyja «hazavyja vojny». I siońnia Rasija pacichu zachoplivaje nas, chacia b ekanamična.

Łukašenka ŭsio viedaje, i jon łaviruje. Jon viedaje i pra toje, što bolšaść u Biełarusi padtrymlivaje Rasiju, i ŭsio astatniaje. Ale jon nie moža rezka parvać z Pucinym i paviarnucca na Zachad. Siońnia vielmi niebiaśpiečnaja situacyja, treba pavodzić siabie razumna, što i robić Łukašenka.

Treba padziakavać prezidentu, što jon nie padtrymaŭ anieksiju Kryma, nie pryznaŭ niezaležnaść Abchazii.

Treba ćviaroza hladzieć na situacyju, a nie imknucca źviarhać kiraŭnika Biełarusi. Bo kali nie Łukašenka, to chto? Ja nie viedaju.

***

Pavialičyć

Alaksandr Novikaŭ naradziŭsia ŭ 1951 u Homieli. Udzielnik afhanskich padziej: 1986—1988, daradca. Maje dźvie vyšejšyja adukacyi: matematyk (1978); psichołah, praktyčny psichołah (1999). Bolš za dziesiać hadoŭ — pamočnik davieranaj asoby prezidenta Respubliki Biełaruś, člena savieta respubliki (1998—2008). Praciahły pieryjad vioŭ pryvatnuju psichałahičnuju praktyku. Publikavaŭsia ŭ časopisach «Biełaruskaja dumka», «Biełaja vieža». Aŭtar i kiraŭnik biełaruskaha litaraturnaha partała «LitKrytyka.by».

• 0
• 0
• 0
• 0
• 0
• 0