16 krasavika startuje ŭžo Šosty fiestyval biełaruskamoŭnaj rekłamy i kamunikacyi AD.NAK! Z 20 krasavika da 1 červienia budzie adkryty pryjom pracaŭ ad udzielnikaŭ Fiestyvalu, a cyrymonija ŭznaharodžańnia projdzie 2 lipienia u Minsku. Jak zaŭsiody, udzieł u Fiestyvali biaspłatny.
Kožny hod Fiestyval pradukuje novuju ideju, źviartaje ŭvahu hramadskaści na roznyja aktualnyja pytańni kamunikacyi i rekłamy. Asnoŭnaja kancepcyja sioletniaha Šostaha AD.NAK! — «Hodny šlach rekłamista».
Na dumku kaardynatara kampanii «Budźma biełarusami!» Niny Šydłoŭskaj, Fiestyval užo prajšoŭ peŭny šlach i staŭ aktualnaj źjavaj biełaruskaha žyćcia, tamu nadyšoŭ čas źviarnuć uvahu na asobu stvaralnika rekłamy. «Rekłamny i – šyrej – kulturnicki pradukt robiać kankretnyja ludzi. Ad ich majsterstva, kaštoŭnaściaŭ i śvietapohladu zaležyć šmat. Tamu ŭ centry ŭvahi sioletniaha Fiestyvalu – asoba samoha stvaralnika. Kožny rekłamist prachodzić svoj indyvidualny šlach da pośpiechu, da ŭnikalnaj idei. Spačatku – pošuki i sumnievy, potym – kancepcyja i ŭ vyniku – voś jon, pracoŭny varyjant. Taki šlach prachodzić ciapier i našaja rekłama: ad niaśmiełych sprobaŭ, sumnievaŭ, ci varta rekłamavacca pa-biełarusku, da taho samaha momantu, kali ty nie baišsia na poŭny hołas zajavić pra siabie jak pra stvaralnika biełaruskaj rekłamy».
Šosty fiectyval AD.NAK! zaprašaje rekłamistaŭ, śpiecyjalistaŭ u śfiery kamunikacyi, kulturnickich mieniedžaraŭ i pradziusaraŭ abjadnać svaje namahańni i dapamahčy biełaruskamoŭnaj rekłamie prajści hety šlach: ad nierašučaj koski da značnaha i ŭpeŭnienaha kličnika!
Hienieralnym partnioram Fiestyvalu druhi hod zapar vystupiła kampanija velcom. Dziakujučy takoj padtrymcy Fiestyval, jak zaŭsiody, projdzie na vysokim arhanizacyjnym uzroŭni, a pieramožcy atrymajuć admietnyja ŭznaharody.
Pryjom pracaŭ da ŭdziełu ŭ naminacyjach i konkursach Šostaha fiestyvalu AD.NAK! pačynajecca 16 krasavika. Dedłajn pryjomu rabot pryznačany na 1 červienia. A finalnaja častka Fiestyvalu – uračystaja cyrymonija ŭznaharodžańnia pieramožcaŭ z papiaredniaj adukacyjnaj prahramaj – projdzie 2 lipienia ŭ Minsku.
Jak adznačyŭ Siarhiej Skarachod, kiraŭnik resursa marketing.by i pastajanny partnior kampanii «Budźma biełarusami!» ŭ praviadzieńni fiestyvalu, «my štohod sočym za aktualnymi tendencyjami i suśvietnymi trendami rekłamnaj i kamunikacyjnaj haliny. Uličvajučy ich, my dapoŭnili i abnavili naminacyi i konkursy, a novy sajt Fiestyvalu sioleta dazvalaje kankursantam maksimalna zručna aformić i padać rabotu. Asnoŭny akcent pry padačy rabot na sajcie zrobleny na jakaść ich afarmleńnia. Udzielnikam prapanavanyja standarty i ŭzory padačy. Spadziajemsia, što sioletniaje novaŭviadzieńnie dazvolić udzielnikam karektna danieści idei svaich prajektaŭ, a siabram žury – abjektyŭna acanić pracy kankursantaŭ».
Padčas tradycyjnaj (jak i štohod, admietnaj) adukacyjnaj prahramy arhanizatary Šostaha AD.NAK! vyrašyli trymacca suśvietnych tendencyj i vyjści za miežy rekłamnaj haliny. U hetym hodzie akramia rekłamistaŭ śpikierami na adukacyjnaj prahramie buduć viadomyja litaratary, tvorcy i fatohrafy ź Biełarusi, Francyi i Litvy. Razam z udzielnikami jany parazvažajuć pra śviet vakoł nas, u jakim my ŭsie razam musim stvarać i iści svaim hodnym šlacham.
Kamientary