Siońnia ŭ katalikoŭ pačynajecca Vialiki post

6 lutaha pačynajecca Vialiki post — sarakadzionny liturhičny pieryjad padrychtoŭki da Vielikodnych śviataŭ. Jon tradycyjna pačynajecca ŭ Papialcovuju sieradu, jakaja nazyvajecca tak ad abradu pasypańnia hałovaŭ popiełam.

U hety dzień u kaściołach adbyvajecca błahasłaŭleńnie popiełu sa spalenych halinak vierbaŭ, aśviečanych u letašniuju Palmovuju niadzielu. Hetym popiełam śviatar pasypaje hałovy viernikaŭ sa słovami: «Kajciesia i viercie ŭ Jevanhielle» albo «Pamiataj, što ty — prach, i ŭ prach vierniešsia». Hetaje liturhičnaje dziejańnie vyjaŭlaje našu hatoŭnaść da pakajańnia, da vielikaposnych askietyčnych praktykavańniaŭ, a taksama padkreślivaje praŭdu pra śmiarotnaść i praminalnaść časovych dabrotaŭ.

Na ŭzor sarakahadovaha vandravańnia, jakoje, raspačaŭšysia ŭ śviata Paschi, pryviało vybrany narod ź jehipieckaj niavoli ŭ ziamlu abiacanuju, a taksama pa prykładu samoha Chrysta, jaki sorak dzion prabyvaŭ u pustyni, Kaścioł na praciahu saraka dzion rychtujecca da Paschalnaha Tryduuma. Pieryjad Vialikaha postu źviazany z pakajańniem i askiezaj, a taksama asablivym čynam pryśviečany razvažańniu nad Mukaj Pana (pasijnyja nabaženstvy — Kryžovy šlach, Pieśni žalby). U chryścijanskaj tradycyi Vialiki post zaŭsiody byŭ źviazany z ustrymańniem ad udziełu ŭ zabavach, ad miasnych stravaŭ i ad ałkaholu. Źniešnimi prajavami Vialikaha postu źjaŭlajucca: fijaletavy koler liturhičnaha adzieńnia, adsutnaść u śviatoj Imšy śpievu «Alleluja» i himna «Chvała na vyšyniach Bohu...», bolš ścipłaje azdableńnie kaściołaŭ, a ź piataj niadzieli Vialikaha postu — zachinutyja fijaletavaj tkaninaj kryžy. Vialiki post — heta taksama pieryjad padrychtoŭki katechumienaŭ da pryniaćcia sakramentu chrostu, jaki tradycyjna ŭdzialajecca ŭ Paschalnuju vihiliju.

U adpaviednaści z kaściolnymi nakazami kožny katalik abaviazany prynamsi raz na hod u Vielikodny pieryjad, jaki achoplivaje akramia samoha Vielikodnaha pieryjadu taksama i pieryjad Vialikaha postu, prystupić da sakramentu pakajańnia (spoviedzi) i pryniać śviatuju Kamuniju. U Papialcovuju sieradu i ŭ Vialikuju piatnicu Muki Pana pradpisany abaviazkovy strohi post — na praciahu dnia možna tolki adzin raz pajeści dasyta, ustrymlivajučysia ad miasnych i małočnych stravaŭ, a taksama ad ałkaholu. Zhodna z tradycyjaj, strohi post zachoŭvajecca i ŭ Vialikuju subotu. Jon nie źjaŭlajecca abaviazkovym dla maleńkich dziaciej, kormiačych maci i chvorych.

Abmiežavańnie ŭ ježy i pićci źjaŭlajecca askietyčnym praktykavańniem i prajavaju pakajańnia, a taksama naśledavańniem Chrysta, jaki sam časta paściŭsia i padkreślivaŭ važnaść postu (par. Mc 17, 21 i Mc 6, 16-19). U Kaściole adroźnivajucca strohi post i ŭstrymańnie (abstyniencyja). Pa piatnicach Kaścioł nakazvaje ŭstrymlivacca ad miasnych stravaŭ. Post — heta adzin z najvažniejšych chryścijanskich učynkaŭ razam z malitvaju i miłaścinaj. Takim čynam, pakajańnie ŭklučaje akramia postu taksama malitvu i dobryja ŭčynki. U pieryjad Vialikaha postu ŭ parafijach pravodziacca duchoŭnyja praktykavańni — rekalekcyi — u jakich moža ŭdzielničać kožny viernik.

Sioleta Vialikdzień pavodle hryharyjanskaha kalendara vielmi rana – 23 sakavika. Pravasłaŭny Vialikdzień – 27 krasavika, a post pačniecca 10 sakavika.

catholic.by

• 0
• 0
• 0
• 0
• 0
• 0
• 0
• 0