Urad biare pad kantrol dziejnaść zamiežnych śviataroŭ

Saviet ministraŭ zaćvierdziŭ novaje Pałažeńnie ab paradku zaprašeńnia ŭ Biełaruś zamiežnikaŭ dla zaniatkaŭ relihijnaj dziejnaściu.

U adpaviednaści z pastanovaj Savietu Ministraŭ, ciapier, kab u Biełaruś pryjechaŭ, da prykładu, śviatar z‑za miažy słužyć u kaściole, albo vykładčyk ŭ duchoŭnuju navučalnuju ŭstanovu, ci luby inšaziemiec dla ŭdziełu ŭ dabračynnych akcyjach albo inšych masavych mierapryjemstvach relihijnaha charaktaru, treba atrymać dazvoł Upaŭnavažanaha pa spravach relihijaŭ i nacyjanalnaściaŭ. Tłumačyć presavy sakratar aparatu Ŭpaŭnavažanaha Michaił Rybakoŭ:

«Kali zaprašaje relihijnaja arhanizacyja, jana pavinna abhruntavać, kaho, navošta, na jaki termin zaprašaje. Kali nie chapaje śviataroŭ — my ich kandydatury ŭzhadniajem, razhladajem dakumenty. Treba, kab usio było dakładna, zrazumieła, prazrysta».

Takim čynam, kožnamu zamiežniku, jaki pryjaždžaje ŭ Biełaruś dla ažyćciaŭleńnia luboj relihijnaj dziejnaści, nieabchodna padrychtavać ceły pakiet dakumentaŭ, što paćviardžajuć jahonuju kvalifikacyju. Śviataru, da prykładu, nieabchodna pradstavić dakument ab relihijnaj adukacyi i daviedku pra staž pracy. Dla vykładańnia ŭ duchoŭnych navučalnych ustanovach — jašče i vučebnyja plany. Zamiežniki taksama pavinny paćvierdzić viedańnie biełaruskaj albo rasiejskaj movy. Takim čynam, čytać lekcyi dla seminarystaŭ albo pravodzić nabaženstvy jany pavinny buduć tolki pa‑rasiejsku albo pa‑biełarusku. Pry adsutnaści luboha z dakumentaŭ zajaŭka nia budzie razhladacca. Da taho ž, Upaŭnavažany pa spravach relihijaŭ i nacyjanalnaściaŭ moža admović pretendentu biez tłumačeńnia pryčynaŭ, što supiarečyć, da prykładu, artykułu 29 Zakonu «Ab svabodzie sumleńnia i relihijnych arhanizacyjaŭ».

Miascovych śviataroŭ nie chapaje ŭ pratestanckich, katalickich chramach. U Biełarusi jość dźvie katalickija duchoŭnyja seminaryi — u Pinsku i Horadni, jakija ŭžo padrychtavali bolš za 160 śviataroŭ, ale ksiandzoŭ ŭsio adno nie chapaje, kaža ksiondz Alaksandar Amialčenia

«Kaniečnie, isnuje deficyt. Na dadzieny momant chiba što 50% miascovych śviataroŭ pracuje, astatnija 50% śviataroŭ z zamiežža ŭ nas pracuje. Kaniečnie, my imkniemsia, kab śviatary byli miascovymi, chacia z udziačnaściu stavimsia da tych, jakija pracujuć pa 10 i bolš hadoŭ dla Biełarusi».

Pryčym, što da padrychtoŭki katalickich śviataroŭ, prahramy ŭ seminaryjach usich krainaŭ universalnyja, zaćvierdžanyja Vatykanam. Takim čynam, ksiandzy, jakija vučylisia, da prykładu, u Polšy i ŭ Pinskaj albo Haradzienskaj seminaryjach, atrymoŭvajuć adnolkavuju adukacyju.

Radyjo Svaboda

• 0
• 0
• 0
• 0
• 0
• 0
• 0
• 0