Maci Źmitra Žaleźničenki padała ŭ sud na hazietu «Homielskaja pravda»

13 lutaha Ała Žaleźničenka, maci homielskaha aktyvista maładziožnaha demakratyčnaha ruchu Dźmitryja Žaleźničenki, jaki ciapier prachodzić słužbu ŭ armii, źviarnułasia ŭ sud ź iskavaj zajavaj ab abaronie honaru, hodnaści i dziełavoj reputacyi da abłasnoj haziety «Homielskaja pravda».

Pradstaŭlajučy intaresy svajho syna, A.Žaleźničenka prosić sud abaviazać abłasnuju hazietu apublikavać abviaržeńnie artykuła «Nie chaču ŭ sałdaty, chaču ŭ demakraty», apublikavanaha ŭ № 22, i prynieści publičnyja prabačeńni D.Žaleźničenku i jaho siamji.

«U artykule razmova idzie ab maim synie, pryzvanym ciapier na terminovuju vajennuju słužbu. Liču, što źviestki, jakija ŭtrymlivajucca ŭ apublikavanym artykule aŭtara Ju.Čarot, parušajuć prezumpcyju nievinavataści i dobraprystojnaści majho syna, u hłyboka źnievažalnaj formie prypisvajuć jamu nie tolki amaralnyja, ale navat złačynnyja dziejańni, — havorycca ŭ iskavaj zajavie A.Žaleźničenki. — Artykuł aŭtara Ju.Čarot pačynajecca z praviadzieńnia paralelaŭ pamiž maim synam i niekatorymi pryzyŭnikami, jakija simulujuć fizičnuju niemač, «kosiać», jak vykazvajecca aŭtar, «pad durnieńkaha», chavajucca ad pryzyŭnoj kamisii. Moj syn nikoli nie simulavaŭ fizičnaj niemačy, nie kasiŭ «pad durnieńkaha» i nie chavaŭsia ad pryzyŭnoj kamisii. Ciapier moj syn słužyć Radzimie i adnačasova ŭ strohaj adpaviednaści z zakanadaŭstvam Respubliki Biełaruś dakazvaje fakt niezakonnaści pryzyvu na terminovuju vajennuju słužbu. Bolš za toje, pa stanie na dzień vychadu publikacyi z druku, a mienavita pa stanie na 9 lutaha 2008 hoda, pastanovaj suda Savieckaha rajona rašeńnie pryzyŭnoj kamisii ab pryzyvie majho syna na terminovuju vajennuju słužbu prypyniena».

A.Žaleźničenka ličyć, što infarmacyja ŭ artykule nie adpaviadaje rečaisnaści i źjaŭlajecca hałasłoŭnaj, vydumkaj aŭtara. Źviestki, pryviedzienyja ŭ artykule, skiravany na dyskredytacyju Žaleźničenki, jaki ŭ adpaviednaści z zakanadaŭstvam abskardžvaje ciapier jak niezakonny pryzyŭ u armiju, hetak i adličeńnie z Homielskaha dziaržuniviersiteta.

Nahadajem, student‑vydatnik Z.Žaleźničenka byŭ dvojčy adličany z Homielskaha dziaržaŭnaha univiersiteta imia F.Skaryny. Pieršy raz namieśnik staršyni abłasnoj arhanizacyi «Moładź BNF» abskardziŭ u sudzie adličeńnie i byŭ adnoŭleny. Ale praz čatyry dni paśla adnaŭleńnia ŭ VNU byŭ znoŭ adličany i 25 studzienia pryzvany ŭ armiju.

Alena Hiermanovič, BiełaPAN

• 0
• 0
• 0
• 0
• 0
• 0
• 0
• 0