Ministerstva abarony Rasii ŭ lipieni minułaha hoda vykarystała padroblenyja fatahrafii, kab abvinavacić Ukrainu ŭ katastrofie łajniera Malaysia Airlines. Da takoj vysnovy pryjšli śledčyja brytanskaha sajta Bellingcat, piša lb.ua.
21 lipienia 2014 h. MA RF praviało bryfinh, apublikavaŭšy spadarožnikavyja zdymki z uschodu Ukrainy, na jakich nibyta była zachavanaja aktyŭnaść ukrainskaha SPA 17 lipienia, kali ruchnuŭ MH17. Praź niekalki dzion SBU abvierhła sapraŭdnaść hetych fatahrafij, ale MA RF adkinuła vysnovy Ukrainy.
Adna z fatahrafij pavinna była pakazać, što minimum adna samachodnaja puskavaja ŭstanoŭka «Buk» i try mašyny padtrymki adsutničali na ŭkrainskaj vajskovaj bazie na poŭnač ad Daniecka 17 lipienia.
Jašče adna — što dźvie samachodnyja ŭstanoŭki «Buk» i jašče adna ŭkrainskaja bajavaja mašyna znachodzilisia na poŭdzień ad vioski Zaroščanskaje.
Adnak mietadam pravierki ŭzroŭniu pamyłak (Error Level Analysis, ELA) udałosia ustanavić, što vobłaka ŭ krajniaj levaj častcy pieršaha zdymka było dadadziena ŭ čas jaho redahavańnia. Zroblena heta było dla taho, kab schavać toj fakt, što fatahrafija była zroblena jak minimum za miesiac da padzieńnia — a mienavita ŭ pramiežku času z 1 červienia 2014 h. da 18 červienia 2014 hoda. Ustanavić heta ŭdałosia pry dapamozie paraŭnalnaha analizu sa spadarožnikavych zdymak kart Google. Na miescy abłokaŭ ŭ rečaisnaści pavinna była znachodzicca lesapasadki, jakaja da daty avijakatastrofy byli vysiečany.
Kab dakazać heta, daśledčyki źviarnuli ŭvahu na drobnuju detal - aŭtamabil, ź jakoha vyciakaje niejkaja vadkaść, vierahodna, aliva.
Vadkaść źbirajecca ŭ łužyny, jakija pavialičvajucca pa miery vyciakańnia. Hety fakt dazvalaje ŭstalavać chranałohiju spadarožnikavych zdymkaŭ. Dyk voś, da 19 červienia, jakim datujecca adzin sa zdymkaŭ Google, hetaja łužyna ŭžo značna raściakłasia, tady jak na zdymku Minabarony RF jana jašče nievialikaja.
Druhi zdymak ad MA RF taksama byŭ padrobkaj. Pa-pieršaje, mietad ELA vyjaviŭ, što malunki vajennaj techniki na im charaktaryzujucca radykalnym adroźnieńniem uzroŭniu pamyłak ad navakolnych elemientaŭ łandšaftu, h.zn. fota padvierhałasia ličbavamu redahavańniu. Paraŭnańnie łandšaftu na fatahrafii sa spadarožnikavymi zdymkami z Google Earth taksama pakazała, što jana była źniataja jak minimum raniej za 15 lipienia, to bok, da padzieńnia «Boinha».
«Naš analiz usich troch fotazdymkaŭ jasna i niedvuchsensoŭna pakazaŭ, što hetyja vyjavy byli źmienienyja. Z vysokaj vierahodnaściu možna śćviardžać, što značnaja častka źmiestu kožnaha zdymka padvierhnułasia ličbavamu redahavańniu z dapamohaj PA Adobe Photoshop CS5., — havorycca ŭ publikacyi.
«Akramia taho, ustanoŭlena, što ŭsie try spadarožnikavyja zdymki byli zroblenyja da 17 lipienia 2014 hoda. Vierahodnaść taho, što MA RF vypadkova niapravilna datavała apublikavanyja fatahrafii, možna vyklučyć. 21 lipienia 2014 hoda Ministerstva abarony Rasijskaj Fiederacyi pradstaviła suśvietnaj hramadskaści adredahavanyja i iłžyva datavanyja spadarožnikavyja zdymki, kab abvinavacić ukrainskuju armiju ŭ źbićci MH17», — śćviardžajuć daśledčyki.
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury5
Kamientary