Kiraŭnik Minsielhascharča: Biełaruś sutykajecca ź pieraškodami pry pastaŭcy charčavańnia ŭ ES

Biełaruś sutykajecca ź pieraškodami pry pastaŭcy charčovaj pradukcyi ŭ krainy Jeŭrasajuza, paviedamiŭ žurnalistam 2 červienia ŭ Minsku ministr sielskaj haspadarki i charčavańnia Leanid Zajac.

Pavodle jaho słoŭ, siońnia piać biełaruskich pradpryjemstvaŭ siertyfikavanyja dla pastavak pradukcyi na jeŭrapiejski rynak. «Naprykład, «Savuškavy pradukt» pastaŭlaje małočnuju pradukcyju. Ale vielmi ciažka tudy idzie prasoŭvańnie našaha tavaru. Nie pa jakaści, a ŭ suviazi z pošlinnaj achovaj. ES z metaj achovy svajho vytvorcy zaharadziŭsia vialikimi pošlinami. Naš tavar pavodle aznačeńnia nie prachodzić pa cenavym faktary», — skazaŭ ministr. 

Zajac taksama paviedamiŭ pra vyniki niadaŭniaha vizitu ŭ ZŠA (17—21 maja) delehacyi Minsielhascharča, jakuju jon uznačalvaŭ. «My akreślili peŭnyja pazicyi, jakija pavinny prasoŭvać na rynak ZŠA. Heta 11 pazicyj, siarod jakich małočnaja, vina-harełačnaja pradukcyja, kandytarskija vyraby, pušnyja vyraby, lonavyja tkaniny i hatovyja vyraby ź lonu», — skazaŭ ministr. Pavodle jaho słoŭ, tavaraabarot pradukcyi sielskaj haspadarki pakul nievialiki — 2,5 młn. dołaraŭ. «Ale my bačym: ZŠA — mahutny, hłabalny rynak, na jaki nam nieabchodna vychodzić», — padkreśliŭ kiraŭnik Minsielhascharča. 

Sioleta, pavodle jaho słoŭ, pastaŭlenaja zadača — zabiaśpiečyć prytok valuty ad ekspartu charčovaj pradukcyi ŭ pamiery nie mienšym za 7 młrd. dołaraŭ.

«Heta vielmi surjoznaja, ambicyjnaja ličba, ale my pracujem u hetym kirunku», — skazaŭ Zajac. Jon vykazaŭ nadzieju na toje, što zhadany abjom ekspartu budzie dasiahnuty, «jak by ciažka ni išła realizacyja pradukcyi». «Heta źviazana sa źniešnimi faktarami, jakija ad nas nie zaležać», — rastłumačyŭ ministr, adznačyŭšy devalvacyju valuty ŭ Rasii i Kazachstanie, partniorach Biełarusi pa Jeŭrazijskim ekanamičnym sajuzie. 

Pry hetym Zajac padkreśliŭ, što asnoŭnym rynkam była i zastajecca Rasija.

«Hety rynak bolš premijalny, bolš abjomny, bolš maštabny. My daražym hetym rynkam i ŭsialak budziem imknucca zamacavacca na im», — zajaviŭ ministr.

Razam z tym, pavodle jaho słoŭ, adbyvajecca dyviersifikacyja pastavak — na rynki Blizkaha Uschodu, Azii, Amieryki. Na rynki trecich krain z pačatku hoda abjom ekspartu vyras na 8%. «Heta nas nie zadavalniaje, ale my znachodzimsia ŭ pošukach bolš hłabalnych rynkaŭ, naprykład Kitaja», — zaznačyŭ Zajac. Pavodle jaho słoŭ, siertyfikaty na pastaŭku pradukcyi ŭ KNR užo atrymali 15 biełaruskich pradpryjemstvaŭ. 

Što da ŭnutranaha rynku, to, jak zapeŭniŭ ministr, u Biełarusi vyrablajecca dastatkova pradukcyi dla zabieśpiačeńnia jaho patrebaŭ. Na ekspart ža pastaŭlajecca 55% ad ahulnaha abjomu vytvorčaści.

• 0
• 0
• 0
• 0
• 0
• 0
• 0
• 0