A taksama abaronić sietkavuju niejtralnaść.
Jeŭrapiejski sajuz paśla 18 miesiacaŭ abmierkavańnia damoviŭsia ab skasavańni płaty za roŭminh z 15 červienia 2017 hoda i ŭpieršyniu padrabiazna apisaŭ praviły abarony internetu i internaŭtaŭ, a taksama sietkavaj niejtralnaści.
Praz dva hady pry telefanavańniach ci internet-sieansach čałaviek budzie płacić pa ŭsioj Jeŭropie stolki ž, kolki doma.
Ceny na roŭminh spaduć užo praz hod.
Praviły baroniać ad «piermanientnaha roŭminhu»: kali čałaviek kuplaje sim-kartku na čužynie (dzie taniej) dla karystańnia doma, jon ź ciaham času dasiahnie limitu vykarystańnia i budzie płacić dadatkovy ŭniosak. Takim čynam miascovyja apieratary nie stanuć bolš ci mienš vyhadnymi za zamiežnych.
Padvyšeńnia «chatnich» cen apierataraŭ u Jeŭropie nie bajacca: śćviardžajecca, što kali ludzi buduć pazbaŭlenyja pierapłat u roŭminhu, jany stanuć čaściej karystacca telefonami za miažoj i skampiensujuć takim čynam straty apierataraŭ.
Taksama Jeŭropa abaronić internet: novy zakon zabaraniaje pa ŭsim Jeŭrasajuzie biespryčynnaje błakavańnie sajtaŭ, prahram i servisaŭ (akramia tych, što parušajuć zakon) dy harantuje raŭnapraŭnaść luboha trafiku.
Apošniaje značyć, što, naprykład, trafik z Facebook nie budzie mieć pryjarytet pierad trafikam z sajta biełastockaha «Radyjo Racyja» tolki tamu, što «Fejsbukam» karystajecca bolš čałaviek. Adpaviedna, «Radyjo Racyja» pavinna hruzicca tak ža chutka, jak Facebook, a apierataram zabaroniena brać dadatkovuju płatu za toje, kab «Radyjo Racyja» hruziłasia chutčej za Facebook.
Heta taksama značyć, što jeŭrapiejskija apieratary pazbaŭlajucca prava brać dadatkovuju płatu za asobnyja vidy «ahulnaha» trafiku — naprykład, za mesendžary kštałtu Skype ci Viber, jak toje źbirajucca zrabić u Biełarusi.
Zakon tym časam dazvalaje ŭzvodzić «pa-nad internetam» vysakachutkasnyja servisy kštałtu IPTV ci telechirurhii (kali lekar nie prysutničaje na apieracyi fizična, a kantraluje dziejańni ludziej ci robataŭ praź sieciva), kali jany nie škodziać ahulnaj chutkaści dostupu ŭ internet. Taksama nie zabaraniajecca pradstaŭleńnie biaspłatnaha (ale nie pryjarytetnaha pa chutkaści) dostupu da servisaŭ pa žadańni apieratara.
Kamientary