Užytaje ŭ peŭnym kantekście, jano parušaje praviły sacsietki.
Raskamnahlad pacikaviŭsia ŭ sacyjalnaj sietki Facebook pryčynami błakiroŭki staronki piśmieńnika Eduarda Bahirava, pišuć «Iźviestija». Vyjaviłasia, što jon vykarystoŭvaŭ słova, roŭnaje pa abraźlivaści tak zvanamu «n-word».
Farmuloŭka «niaščasnyja chachły», što była ŭžytaja ŭ adnym z pastoŭ piśmieńnika, parušaje praviły Facebook. Akaŭnt zabłakavany, bo isnavała «realnaja pahroza naniasieńnia fizičnaj škody ci pramaja pahroza hramadskaj biaśpiecy».
Piśmieńnik u tym poście paraŭnoŭvaŭ rasiejcaŭ i ŭkraincaŭ u ich staŭleńni da antysavieckich arhanizacyj u čas Druhoj suśvietnaj.
U Rasii hienierał Ułasaŭ, kiraŭnik Ruskaj vyzvalenčaj armii [vajavała na boku Treciaha rejchu — NN] ličycca zdradnikam, va Ukrainie lidary Arhanizacyi Ukrainskich nacyjanalistaŭ [z kanca 20-ch viała antykamunistyčnuju dziejnaść dziela dziela niezaležnaści Ukrainy; u čas vajny niaŭdała sprabavała damovicca ź niemcami ab pryznańni Ukrainy, kanfliktavała ź imi — NN] Ściapan Bandera i Raman Šuchievič ličacca hierojami.
Bahiraŭ ličyć, što «dla ruskaha piśmieńnika, hłyboka pahružanaha ŭ ruskuju litaraturu, słova «chachły» niehatyŭnaj intanacyi nie niasie».
«Heta bracki zvarot. Kali maje siabry chachły nazyvajuć mianie kacapam ci maskalom, mnie ŭ hałavu nie pryjdzie sčytvać u hetym niehatyŭnuju intanacyju, — kaža Bahiraŭ. — Tym bolš, jak ni kruci, chachły našyja braty. My adzin narod».
***
Na Facebook karystalnika mohuć zabłakavać za «n-word» — słova «nihier», užytaje ŭ abraźlivym kantekście. Čarnaskuryja amierykancy volna ŭžyvajuć heta słova ŭ dačynieńni da čarnaskurych, jano časta sustrakajecca ŭ pieśniach. Tym časam kali słova ŭžyvajecca ŭ kantekście prynižeńnia čarnaskurych, jano stanovicca nieprystojnym.
U mnohich inšych movach padobnyja słovy (naprykład, «niehr» u biełaruskaj) zvyčajna nie ličycca abraźlivym. Ale abraźlivymi mohuć ličycca niekatoryja nazvy narodaŭ, narmalnyja dla inšych moŭ (naprykład, u polskaj movie słova «żyd» ličycca narmalnym, biełaruskich jaŭrejaŭ słova «žyd» chutčej za ŭsio abrazić).
U niekatorych krainach słovy, jakija častka narodu ličyć abraźlivymi, mohuć navat vykarystoŭvacca jak brendy («bulbaš» u Biełarusi vykarystoŭvajecca jak ałkaholny brend, ale «chachoł» va Ukrainie, «maskal» u Rasii ci «nihier» u ZŠA jak brendy nie vykarystoŭvajucca).
Kamientary