Vital Stanišeŭski: Śviatkavać Kupalle z 6 na 7 lipienia histaryčna pravilna
Na maju dumku, data biełaruskaha Kupalla 6 lipienia — pravilnaja. Pahartajcie padšyŭki «Našaj Nivy» 1910 i 1911 hoda, tady śviata prypadała na noč z 23 na 24 červienia staroha stylu.
Hetuju ž datu fiksuje i Kirkor u raniejšaj «Živopisnoj Rośsii» (1882). A mienavita z tahačasnych narodnych abradaŭ Kupalle i trapiła ŭ śviaty biełaruskaha narodu, jaki tady adradžaŭsia, h.zn. z kankretnaj dataj, a nie tearetyčnymi vykładkami pra soncastajańnie i roźnicu miž julijanskim i hryharyjanskim kalendarom.
Biełarusy śviatkavali Kupalle tak, jak śviatkavali, i kali jany pryviazvali heta da chryścijanskaha śviata, jakoje śviatkavałasia pavodle adpaviednaha kalendara, to na toje była ich vola. Kali niechta cikavicca tradycyjaj, to dziŭna tearetyzavać, a nie prymać jaje jak jość. Julijanski kalandar byŭ u pravasłaŭnaj carkvy VKŁ, praciahnuŭsia va ŭnijackaj až da 1839, kali jaje skasavali, i dalej byŭ u pravasłaŭnaj. To bok, tradycyja śviatkavać u datu, adroznuju ad niepasrednaj daty soncastajańnia, tryvała stahodździami.
Pad pytańniem — što było ŭ biełaruskich katalikoŭ, h.zn. u toj častki ŭnijataŭ, što nie pierajšła ŭ pravasłaŭje. Tut prośba da bolš daśviedčanych śpiecyjalistaŭ aśviatlić hety momant. Z aficyjnym pryniaćciem hryharyjanskaha kalendara Kupalle prypała adpaviedna na noč z 6 na 7 lipienia. Śviatkavać Kupalle raniej — heta niejkaja madyfikacyja tradycyi.
Kamientary