Pradstaŭnik kitajskaj kampanii: Kanflikt z rabočymi ŭ Dobrušy vyčarpany

Kanflikt pamiž kitajskimi rabočymi, zaniatymi na budaŭnictvie kardonnaj fabryki ŭ Dobrušy, i kampanijaj Xuan Yuan Industrial Development Co. LTD, hienpadradčykam budaŭnictva, vyčarpany. 

«Situacyja ŭrehulavanaja. Usiu zarpłatu, jakaja im naličanaja, vypłacili, daŭhoŭ niama», — paviedamiŭ BiełaPAN supracoŭnik pradstaŭnictva kitajskaj kampanii ŭ Biełarusi, jaki admoviŭsia nazvać svajo imia. 

Pavodle jaho słoŭ, «heta była niezadavolenaść prykładna 10—20 čałaviek, jakija vystupili zavadatarami pratestnych mierapryjemstvaŭ». «Heta ž mužčynski kalektyŭ na vielmi nievialikaj terytoryi ziamli. Viadoma, jość niejkija niezadavolenaści, niejkija pažadańni. Heta naturalna», — skazaŭ pradstaŭnik kitajskaj kampanii. 

Na pytańnie, na praciahu jakoha času ludziam nie płacili zarpłatu, jon nie zmoh adkazać. Nie zmoh nazvać i sumu zavinavačanaści. 

Na siońniašni dzień, dadaŭ supracoŭnik kampanii, bolšaść udzielnikaŭ pratestu adnavili pracu. «Rabota idzie, tamu što ŭsie dobra razumiejuć, što abjekt pavinien być zdadzieny svoječasova», — skazaŭ jon. 

Što da mahčymaj departacyi zavadataraŭ pratestu, jakuju raniej nie vyklučaŭ staršynia kancerna «Biellespapierapram» Juryj Nazaraŭ, to heta pytańnie, pavodle słoŭ pradstaŭnika kitajskaj kampanii, znachodzicca ŭ kampietencyi departamienta pa hramadzianstvie i mihracyi MUS. 

Nahadajem, prykładna 200 kitajskich rabočych, zaniatych na budaŭnictvie Dobrušskaha kardonnaha kambinata, ranicaj 2 lipienia adpravilisia pieššu ŭ Homiel, pratestujučy takim čynam suprać niavypłaty zarpłaty. Budaŭnictva viadzie kitajskaja karparacyja Xuan Yuan Industrial Development Co., LTD, jana ž płacić budaŭnikam z KNR zarabotnuju płatu, jakuju, jak śćviardžali rabočyja, jany nie atrymlivali ŭžo try miesiacy. 

Akcyja pryciahnuła ŭvahu ŚMI, i ŭdzielniki pratestu sustrelisia z pasłom Kitaja Cuj Cyminam. U toj ža dzień kiraŭnik kancerna «Biellespapierapram» Juryj Nazaraŭ skazaŭ žurnalistam, što ŭ dačynieńni da «zavadataraŭ» akcyi moža być užytaja departacyja ź Biełarusi. 

Viadoma taksama, što siońnia, 7 lipienia, Juryj Nazaraŭ i namieśnik kiraŭnika prezidenckaj administracyi Mikałaj Snapkoŭ naviedali Dobruš, kab na miescy aznajomicca ź situacyjaj, adnak padrabiaznaści ich pajezdki nieviadomyja.

Hladzicie taksama: «Nachren jany tut patrebny? Pracu ŭ nas zabirajuć»: žychary Dobruša pra kitajcaŭ VIDEAAPYTANKA

• 0
• 0
• 0
• 0
• 0
• 0